पोखरा । स्पेनिस क्लब रियल मड्रिडको युथ टिम पहिलो पटक युइएफए युथ लिग च्याम्पियन बनेको छ ।

मंगलबार राति स्वीट्जरल्यान्डको नियोनमा भएको फाइनलमा बलियो पोर्चुगिज क्लब बेन्फिकाको युथ टिममाथि ३–२ को कठिन जित निकाल्दै रियल पहिलोपटक युथ लिग च्याम्पियन बनेको हो ।

क्लबका पूर्व फरवार्ड राउल गोन्जालेजको प्रशिक्षणमा रहेको टोलीका लागि रोड्रिग्वेज र गुइटिरेजले गोल गरे । रियलले एक गोल भने आत्मघाती उपहार पाएको थियो । बेन्फिकाको लागि गोन्कालो रामोसले दुई गोल गरेपनि हार टार्न सकेन । रियलका लागि बेनफिकाका हेनरिक जोकुले आत्मघाती गोलको उपहार दिएका थिए ।

खेलको २६ औं मिनेटमा रोड्रिग्वेजको गोलबाट रियलले खेलमा अग्रता बनाएको थियो । पहिलो हाफको इन्ज्युरी समयमा हेनरिक जोकुले आत्मघाती गोल गरेपछि रियलले पहिलो हाफमा २–० को अग्रता बनाएको थियो ।

त्यस्तै, ४९ औं मिनेटमा गोन्कालो रामोसले गोल गर्दै बेन्फिकालाई खेलमा फर्काए । तर, त्यसको एक मिनेटपछि नै गुइटिरेजले गोल गर्दै रियललाई खेलमा ३–१ ले अग्रता दिए । त्यसर्त ५७ औं मिनेटमा गोन्कालोले अर्काे गोल थप्दै खेललाई ३–२ को स्थितिमा ल्याए ।

खेलको ६८ औं मिनेटमा बेन्फिकाले पेनाल्टीमार्फत बराबरी गर्ने अवसर गुमायो । टियागो डान्टसको पेनाल्टीलाई रियल मड्रिडका गोलरक्षक लुइस लोपेजले बचाउँदै बराबरी हुनबाट बचाए । त्यसपछि, बेनफिकाले थप गोल निकाल्न नसक्दा रियल ३–२ ले विजयी बन्यो ।

बेन्फिका तीन संस्करणमा फाइनलमा पुगेपनि उपाधि जित्नबाट बञ्चित बनेको छ । बेन्फिका पहिलो संस्करणमा बार्सिलोना र चौथो संस्करणमा रेडबुल साल्जवर्गसँग पराजित बनेको थियो । युइएफएले प्रि–क्वाटरफाइनलको २ खेलदेखि सबै खेल स्वीट्जरल्यान्डको नियोनमा १६ देखि २५ अगस्टसम्म क्लोज डोरमा आयोजना गरेको थियो ।

युइएफएले युवा खेलाडी उत्पादनको परियोजनालाई ध्यानमा राख्दै २०१३ बाट युथ लिगको अवधारणा अघि सारेको थियो । युथ लिग बार्सिलोना र चेल्सीले समान २/२ पटक जितेका छन् । साल्जबर्ग र पोर्टाेले समान १/१ पटक जितेका छन् ।

तस्बीरहरु : एजेन्सीबाट साभार