पोखरा । नेप्लिज पिपुल युकेको विशेष पहलमा नेपाल मगर सांस्कृतिक संघ जिल्ला समन्वय समिति कास्कीले कोरोना र बाढीपहिरो प्रभावित ४४ जना मगर कलाकारलाई पोखरामा राहत वितरण गरेको छ।

कार्यक्रममा प्रमुख अतिथि नेपाली काँग्रेस महासमिति सदस्य एवं पीएन क्याम्पसका पूर्व प्राध्यापक नवराज गुरुङले कोरोना र बाढी पहिरो प्रभावित कलाकारलाई राहतस्वरुप खाद्यान्न र नगद वितरण गरे ।

नेप्लिज पिपुल युकेका तर्फबाट विशेषगरी गोर्खा मिडिया प्रबन्ध निर्देशक, एभरेष्ट टाइम्स युकेका वरिष्ठ फोटोग्राफर मिलन तमु संयोजन र कलाकार मनसुधन थापा, दुर्लुङ समाज युकेका पूर्व अध्यक्ष जेवरीलाल गुरुङ, समाजसेवी कुलराज गुरुङको पहलमा संकलित रकम मगर सांस्कृतिक संघ कास्की अध्यक्ष सरिता सारुमगरलाई १ लाख २५ हजार रुपैयाँ हस्तान्तरण गरिएको हो ।

प्रमुख अतिथि गुरुङले कोरोना र बाढीपिडितबाट प्रभावित मगर कलाकारहरुलाई देश विदेशका सहयोगीहरुको सहयोगमा आहात भएकाहरुलाई राहत वितरणका लागि नेपाल मगर साँस्कृतिक संघ जिल्ला समन्वय समिति कास्की र सहयोगी हातहरुलाई धन्यवाद व्यक्त गरे ।

उनले भने, ‘कोरोनाका कहरले दोहोरीसाँझ बन्द हुँदा संस्कृति, कला, संगीत क्षेत्रमा ठूलो असर पुगेको छ भने कलाकारहरुलाई धेरै समस्या परेको छ ।’

गुरुङले नेपालको परिचय गराउने आदिवासी जनजातिहरु जस्ले प्रथम र दोश्रो युद्ध लडेकाहरुले पनि मुलुकमा विभेद छ भएको भन्दै यस्तै विभेदमा पारिएका मधेशी, महिला, दलित लगायत एकताबद्ध आन्दोलनसँगै आहत भएकाहरुलाई कलाकारझैं आफ्नो तर्फबाट सहयोग गर्नुपर्ने बताए ।

काँग्रेसका पर्वतबाट महासमिति सदस्य मोहन गुरुङले कोरोनाको कहर र बाढी पहिरोबाट प्रभावित मगर कलाकारलाई सहयोग गर्नेलाई धन्यवाद दिए ।

नेपाल मगर सांस्कृतिक संघ जिल्ला समन्वय समिति कास्की अध्यक्ष सरिता सारु मगरको अध्यक्षतामा भएको कार्यक्रममा सचिव सुरेश रानामगरले संचालन गरेका थिए ।