पाेखरा, १५ साउन । राष्ट्रिय खेलकुद परिषद् (राखेप) मा सम्पन्न श्रेष्ठसहित ६ जना सदस्य मनोनीत भएका छन् ।

राखेप उपाध्यक्ष र सदस्यसचिवको पदभारको भोलिपल्टै युवा तथा खेलकुद मन्त्री जगतबहादुर विश्वकर्माले उनीसहित ६ जनालाई मनोनीत गरेका हुन् । राष्ट्रिय खेलकुद विकास ऐन २०७७ अनुसार राखेपमा ३७ सदस्यीय बोर्ड रहने व्यवस्था छ ।

बागलुङ बिहु–४ का सम्पन्न श्रेष्ठ पश्चिमाञ्चल क्षेत्रीय खेलकुद विकासका निवर्तमान अध्यक्ष हुन् ।

राखेप सदस्यसचिव सिफारिस समितिको सदस्य रहेका रिम रानाभाट र इन्दिरा निरौला सदस्य नियुक्त भएका छन् । राखेपका पूर्व अधिकृत समेत रहेका चितवन–२ का रानाभाट र ओखलढुंगा तलुवा–१ की निरौला खेलकुद विज्ञ, खेलकुद प्रशिक्षक, खेलकुद प्राविधिक वा एन्टि डोपिङ विज्ञमध्येबाट मनोनीत गरेको मन्त्रालयले जनाएको छ । निरौला यसअघि पनि राखेप सदस्य थिइन् ।

यस्तै, राष्ट्रिय खेल संघको सिफारिसमा काठमाडौं चपलीका अर्जुनबहादुर केसी, चितवन भरतपुर–१ का सुवास श्रेष्ठ तथा परम्परागत साहसिक तथा पर्यटकीय खेलक्षेत्रको प्रतिनिधित्व हुने गरी गोवन्दप्रसाद भट्टराई मनोनीत भएका छन् ।

यसअघि मन्त्रिपरिषद्को बैठकले उपाध्यक्षमा शिव कोइराला र सदस्यसचिवमा रमेशकुमार सिलवाललाई नियुक्त गरेको थियो । उनीहरुको बुधबारमात्र पद तथा गोपनीयताको शपथ ग्रहण भएको छ ।