नवलपरासी ११ साउन । पूर्वी नवलपरासीको अस्थायी कोरोना अस्पताल सामुदायिक प्राकृतिक चिकित्सालय रजहरबाट ४७ जनाले कोरोना जितेका छन्।

चिकित्सालयका अनुसार विभिन्न उमेर समूहका ६ महिला तथा ४१ पुरुष आइसोलेसन छोडेर घर फर्किएका हुन्।

घर फिर्नेहरुमा गैँडाकोटका ७ जना, देवचुली नगरपालिकाका ६ जना, सदरमुकाम कावासोतीका ८ जना र मध्यविन्दुका २ जना छन्।

यसैगरी, पहाडी बुलिङ्टार गाउँपालिकाका १३ जना, बौदिकालिकाका ३ जना, हुप्सेकोटका २ जना र विनयी त्रिवेणीका ६ जना छन्।

साउन ९ मा न्यानो फ्यारेन्जियल नमूना संकलन गरी पोखरामा गरिएको आरटी पीसिआर परीक्षणमा घर फर्कने सबैको नतिजा नेगेटिभ आएको थियो । यसअघि यहाँको आइसोलेसनबाट एकैपटक ६३ जनाले कोरोना जितेर घर फर्केका थिए।

हाल आइसोलेसनमा ४१ जनाले उपचार गराइरहेको र उनीहरुको स्वास्थ्य अवस्था पनि सामान्य रहेको चिकित्सालयका व्यवस्थापक हरिप्रसाद सापकोटाले बताए।
कोरोना भाइरस (कोभिड–१९) संक्रमण पुष्टि भई आइसोलेसन पुगेदेखि यहाँको प्राकृतिक उपचार पद्दति र मनोरञ्जनपूर्ण योगाभ्यासले कोरोनालाई सहजै जितेको घर फर्कनेहरुले बताए ।
चिकित्सालयका निर्देशक डा विनोद पौडेलले योग ध्यानसाथ आत्मवल वृद्धिका लागि मनोपरामर्स, प्रतिरोधी क्षमता विकासमा स्वस्थ भोजनसहित विजांकुरित गेडागुडी, गुर्जो, अश्वगन्धाजस्ता जडिबुटी दिने गरिएको जानकारी दिए।

डा पौडेलका अनुसार चिकित्सालयमा संक्रमितको उपचारभन्दा पनि उनीहरुमा रहेको भाइरस कसरी कम गर्न सकिन्छ भनेर आहारविहार सहितका प्राकृतिक विधि अपनाउने गरिएको छ ।
संक्रमण रोक्न दूधबेसार सेवन, घाँटी सफा राख्न जलनीति, उत्साह र स्फूर्तिका लागि नित्य, गायन तथा नृत्यमा सरिक गराइने गरिएको डा पौडेलले बताए।