पोखरा । कोरोना भाइरस (कोभिड–१९) संक्रमणकै कारण ४ महिनादेखि बन्द सवारी लाइसेन्स फाराम अझै २ महिना नखुल्ने भएको छ ।

यातायात व्यवस्था विभागले कोरोना संक्रमणकै कारण परिस्थिति अझ सहज हुन नसकेको भन्दै नयाँ सवारी लाइसेन्स फाराम २ महिनापछि धकेलेको हो ।

यातायात व्यवस्था कार्यालय, सवारीचालक अनुमतिपत्र पोखराका सूचना अधिकारी प्रेमप्रसाद श्रेष्ठका अनुसार विभागबाटै २ महिनाका लागि नयाँ सवारी लाइसेन्सको फाराम नभर्न र अनलाइनबाट पनि फाराम नभर्न भनिएको छ ।

गत महिना असार १ देखि कार्यालय खुले पनि सेवाग्राहीको चाप भने निकै कम छ । अहिले कार्यालयबाट लकडाउनअघिका लाइसेन्स वितरण र लाइसेन्सको प्रतिलिपि दिने काममात्र भएको जनाइएको छ । लकडाउनअघि सवारी लाइसेन्स परीक्षा उत्तीण र ट्रायल पास भएकामध्ये २३ हजार सवारी लाइसेन्स अघिल्लो महिना वितरण गरिएको कार्यालय प्रमुख भरतराज काफ्लेले दिए ।

‘गाडी, स्कुटर र मोटरसाइकल लाइसेन्सको ट्रायल पास ५ सय जना र लिखित पास गरी ट्रायल बाँकी रहेका ५ सयको लागि लाइसेन्स छिट्टै टुङ्गाउन विभागमा अनुरोध गरेका छौं,’ काफ्लेले भने ।

यातायात व्यवस्था कार्यालय, सवारीचालक अनुमतिपत्र शाखाबाट असारमा लाइसेन्स वितरण र लाइसेन्सको प्रतिलिपिबाट ९७ लाख रुपैयाँसहित आव २०७६÷०७७ मा कुल १६ करोड १८ लाख ७५ हजार रुपैयाँ राजस्व संकलन गरेको जनाइएको छ ।

यता, कार्यालयमा सेवा लिनेको संख्या पहिलेको तुलनामा एकतिहाइमात्र छ । काफ्लेले भने, ‘राजस्व वृद्धि गर्न नयाँ लाइसेन्सका लागि फाराम खोल्नु आवश्यक छ । सार्वजनिक यातायातका साधन संचालन नभएसम्म नयाँ सवारी लाइसेन्सका लिखित र ट्रायल हुन सक्दैन । लिखित र ट्रायल दिन सर्वसाधारणको भीड नै लाग्ने भएकाले कोरोना संक्रमण न्यूनीकरण नभएसम्म सम्भव छैन ।’

अर्कोतर्फ डाइभिङ इन्स्टिच्युट व्यवसायीले नयाँ सवारी लाइसेन्सका लागि फाराम छिटो खोल्न आग्रह गर्दै आएका छन् । विभागले नयाँ सवारी लाइसेन्सका लागि फाराम नखोल्दा लाखौंदेखि करोड रुपैयाँसम्म लगानी गरेर संचालित ड्राइभिङ इन्स्टिच्युट संकटमा परेको व्यवसायीहरु बताउँछन् ।

कार्यालयको सवारी चालक अनुमतिपत्र पोखरामा ४० जनाको कर्मचारीको दरबन्दी भएपनि हाल २३ जनामात्र कर्मचारी रहेको जानकारी अधिकृत काफ्लेले दिए ।