पाेखरा, ६ साउन । नेपालमा मंगलबार १ सय ५० जना कोरोना संक्रमित थपिएका छन्। योसँगै कुल संक्रमित संख्या १७ हजार ९ सय ९४ पुगेको छ ।

स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमका अनुसार गएको २४ घण्टामा मुलुकका विभिन्न ठाउँमा भएको पीसीआर परीक्षणमा १ सय ५० जनामा कोरोना देखिएको हो ।
सबैभन्दा बढी धनुषामा २९ जनामा सङ्क्रमण पुष्टि भएको छ ।

यस्तै कञ्चनपुरमा २०, महोत्तरीमा १४, दैलेखमा १०, काठमाडौँ र उदयपुरमा ८/८, चितवन र मकवानपुरमा ५/५, बझाङ र डोटीमा ४/४, मोरङ, गोरखा, म्याग्दी, स्याङ्जा, बागलुङ, बाँके, सर्लाही, दाङ र कैलालीमा ३÷३ जना सङ्क्रमित थपिएका छन् ।

यस्तै झापा, इलाम, पर्सा, रामेछाप र सल्यानमा २/२ तथा सप्तरी, काभ्रेपलाञ्चोक, कैलाली, नुवाकोट, ललितपुर, नवलपरासीमा १/१ जना सङ्क्रमित थपिएका छन् ।

विगत २४ घण्टामा ६ सय ९ जना कोरोनाबाट मुक्त भएका छन्। यीसहित हालसम्म १२ हजार ४ सय ७७ जना कोरोनाबाट निको भइ घर फर्किएका छन्।

हालसम्म ३ लाख २३ हजार ८ सय ३५ नमूना पिसिआर विधिबाट परीक्षण गरिएको छ । क्वारेन्टिनमा २१ हजार ७ सय ४ र आइसोलेशनमा ५ हजार ४ सय ७७ जना रहेका छन् ।

रौतहट तथा सुदूरपश्चिम प्रदेशको कैलाली र बाजुरामा ५ सय भन्दा बढी सक्रिय सङ्क्रमित रहेका छन् ।

सात जिल्ला कोरोनाको सक्रिय सङ्क्रमित मुक्त भएका छन् । भोजपुर, पाँचथर, धनकुटा, संखुवासभा, रसुवा, मनाङ र मुस्ताङमा कोरोनाको सक्रिय सङ्क्रमित छैनन् ।

नेपालमा हालसम्म कोरोनाका कारण ४० जनाको मृत्यु भएको छ ।