लेखनाथ | कोभिड—१९ प्रकोपको मारमा परेका विद्यालयहरु संचालन गर्न लेखनाथ उद्योग बाणिज्य संघले चासो देखाएको छ ।

कोरोना कारण शिक्षा क्षेत्रमा पारेको असर सम्बन्धमा सरोकारवालासँग सोमवार संघले छलफल गरेको हो ।

कार्यक्रममा नेशनल प्याब्सनका वरिष्ठ केन्द्रिय उपाध्यक्ष ज्ञानेन्द्रमोहन भट्टराईले सरकारले अन्य क्षेत्रलाई जस्तै निजी विद्यालयलाई पनि सम्बोधन गर्नु पर्नेमा जोड दिए । उनले विद्यार्थीको भविश्य अन्योलमा नराख्न आग्रह गरे ।

प्याव्सन कास्कीका अध्यक्ष प्रेमप्रसाद शर्माले समग्र विद्यालयको अवस्थाबारे जानकारी गराउँदै शिक्षा क्षेत्रमा देखिएको अन्यौलताको छिट्टै अन्त्य हुनु पर्ने बताए ।

कार्यक्रममा एनप्याब्सन कास्की अध्यक्ष हेमन्त अधिकारीले विभेदकारी नीति अन्त्य हुनु पर्नेमा जोड दिए ।

युनिप्स कास्की अध्यक्ष सन्तबहादुर गुरुङले निजी क्षेत्रका विद्यालय संचालनमा सरकारी नीति अस्पष्ट भएको गुनासो राखेका थिए ।

सोही अवसरमा संघका पूर्व अध्यक्ष लक्ष्मीप्रसाद त्रिपाठीले निजी क्षेत्रका ब्यवसायीको समस्याप्रति सरकार गम्भीर नभएको गुनासो राखे ।

संघका पूर्व अध्यक्ष बाबुराम गिरीले स्कुल, कलेज खुलाउन सरकारले नै अग्रसरता देखाउनु पर्ने सुझाव राखेका थिए ।

संघका अध्यक्ष बलराम ढकालले निजी क्षेत्रका समस्याप्रति संघ जिम्मेवार भएर सम्बन्धित निकायमा ध्यानाकर्षण गराउने प्रतिवद्धता व्यक्त गरे ।

संघका महासचिव गोपिचन्द्र बास्तोलाले संचालन गरेको कार्यक्रममा वरिष्ठ उपाध्यक्ष छत्रधर आत्रेयले धन्यवाद ज्ञापन गरेका थिए ।