इन्टरनेसनल अनलाइन कराते कातामा नेपाललाई १० पदक

आदर्श समाज सम्वाददाता
असार २०, २०७७
Sanju Desar, Online Karate Kata

पोखरा । नेपालले आइएसकेयू इन्टरनेसनल अनलाइन कराते काता च्याम्पियनसीपमा ४ स्वर्णसहित १० पदक हात पार्न सफल भएको छ ।

नेपालले ४ स्वर्ण, समान ३÷३ रजत र ३ कांस्य पदक गरी १० पदक जितेको हो । नरहरिपुर कराते डोजो, मच्छेगाउँकी सञ्जु देसारले महिला क्याडेट इभेन्ट्समा श्रीलंकाकी एसएभी देभमिनी डी सिल्भालाई पराजित गर्दै स्वर्ण पदक हात पारिन् । यस्तै, ७ वर्षमुनिको स्पर्धामा प्रशन्न घर्तीमगरले आयोजक भारतका सात्विक खेतानलाई पराजित गर्दै स्वर्ण दिलाए ।

त्यसैगरी, ८ वर्षमुनिको स्पर्धामा सत्कार घर्तीमगरले श्रीलंकाका थरुसा लकमललाई पराजित गर्दै स्वर्ण जिते । यस्तै, महिला १० वर्षमुनिको स्पर्धामा दीक्षा महताराले इरानकी साबा रोहीलाई पराजित गर्दै स्वर्ण हात पारिन् ।

इन्टरनेसनल सोतोकान कराते युनाइटेड (आइएसकेयु) र इन्स्टिच्युट अफ सोतोकान कराते युनाइटेड (आइएसकेयू)को संयुक्त आयोजनामा भएको च्याम्पियनसीपमा पुरुष क्याडेटतर्फ मनीष कार्की, महिलातर्फ ९ वर्षमुनि स्वेता तामाङ र १३ वर्षमुनिको समूहमा सिर्जना महताराले रजत प्राप्त गरे ।

२ जुलाईदेखि सञ्चालन भएको च्याम्पियनसीपमा ९ वर्षमुनिको पुरुष स्पर्धामा मुकेश खड्का, १० वर्षमुनिका स्पर्धामा ओन्तो घर्तीमगर र १३ वर्षमुनिको स्पर्धामा अमृत थोकरले कांस्य पदक प्राप्त गरे ।

Related News

सम्बन्धित समाचार

hero news full width