पोखरा । स्पेनिस ला लिगाको उपाधि होडमा अति नै महत्वपूर्ण मानिएको खेलमा शीर्षस्थानको बार्सिलोना बराबरीमा रोकिएको छ ।

स्पेनिस ला लिगा फुटबल अन्तर्गत शुक्रबार राति भएको खेलमा बार्सिलोना सेभिल्लासँग गोलरहित बराबरीमा रोकिएको हो । यससँगै क्याटलाना क्लब ला लिगामा स्पष्ट ५ अंक लिनबाट चुकेको छ । सेभिल्लासँग बार्सिलोनासँगको बराबरीले उपाधि होडमा रोमाञ्चकता थपेको छ ।

घरेलु मैदानमा भएको खेलमा सेभिल्लाले आफूले गोल गर्न सकेन भने बार्सिलोनालाई पनि गोल गर्न दिएन । गोलरहित यो बराबरीले लिगका ८ खेल बाँकी हुँदा उपाधि होडलाई थप खुला बनाएको छ ।

दोस्रो स्थानको रियल मड्रिडसँगको अंक दूरी ५ कायम गर्ने मौका बार्सिलोनाले गुमायो । यसको अर्थ आइतबार राति रियल सोसिडाडको खेलमा जित निकाले रियल मड्रिडले बार्सिलोनासँग अंक बराबरी गर्नेछ ।

शुक्रबार रातिको खेलमा लियोनल मेस्सीले पहिलो हाफमा प्रहार गरेको फ्री–किक बारमा लागेर गयो । सेभिल्लाको डिफेन्स तोड्न बार्सिलोनालाई मुश्किल परेको थियो ।

बराबरीपछि शीर्ष स्थानको बार्सिलोनाको ३० खेलबाट ६५ अंक भएको छ । एक खेल कम खेलेको दोस्रो स्थानको रियल मड्रिडको ६२ अंक रहेको छ । तेस्रो स्थानको सेभिल्लाले ३० खेलबाट ५२ अंक जोडेको छ ।

ला लिगा अन्तर्गत शुक्रबार राति नै भएका अरु खेलमा भिल्लारियलले ग्रानाडालाई १–० ले हरायो । यस्तै मालोर्का र लेगानेसले १–१ को बराबरी खेल्दै अंक बाँडेका छन् ।