म्याग्दी ,३० जेठ । नेपाल तरुणदल,जिल्ला कार्यसमिति म्याग्दीको आयोजनामा शुक्रबार सदरमुकाम बेनीमा सम्पन्न रक्तदान कार्यक्रमा ४० जनाले रगत दान गरेका छन् ।

नेपाली कांग्रेस म्याग्दीका सभापति खमबहादुर गर्बुजा ‘खम्बिर’को प्रमुख आतिथ्यतामा नेपाल तरुणदल जिल्ला कार्यसमिति म्याग्दीको आयोजना र रक्त सञ्चार केन्द्र बेनीको संयोजनमा शुक्रबार बेनी अस्पताल परिसरमा सम्पन्न सो रक्तदान कार्यक्रममा ४० जनाले रगत दान गरेका तरुणदल म्याग्दी सचिव नगेन्द्र मल्लले जानकारी दिए ।

लकडाउमा रगत अभाव हुन नदिन रक्तदान कार्यक्रमको आयोजना गरिएको तरुणदल म्याग्दीका अध्यक्ष मुकुन्द छन्त्यालले बताए । सभापति गर्बुजाले एक थोपा रगतको कारण पनि मृत्यु शैयामा पुगेको मानिसको जीवन बच्न सक्ने भन्दै रक्तदान जस्तो पवित्र कार्यमा सहभागी हुने र कार्यक्रमको आयोजना गर्ने नेपाल तरुणदल म्याग्दीप्रति आभार व्यक्त गरे ।

कार्यक्रममा नेपाल विद्यार्थी संघ म्याग्दीका सभापति निर्मल खत्री,जिल्ला सदस्य ,कर्मचारी ,जनप्रतिनिधि लगायतले रगत दान गरेका थिए । कार्यक्रममा संविधान सभा सदस्य रेशमबहादुर बानियाँ ,उपसभापति माधवप्रसाद रेग्मी ,सचिव क्याप्टेन मिनबहादुर कार्की ,बेनी नगरपालिकाका मेयर हरिकुमार श्रेष्ठ लगायतको उपस्थिति रहेको थियो ।