पोखरा, २८ जेठ। पोखराबाट काठमाडौं रेफर ६० वर्षीय पुरुषको सम्पर्कमा आएका ३९ जनाको रिपोर्ट नेगेटिभ आएको छ । गण्डकी प्रदेश स्वास्थ्य निर्देशनालयले बुधबार विज्ञप्ति जारी गरी उनीहरुमा कोरोना संक्रमण नभएको अर्थात् नेगेटिभ रिपोर्ट आएको स्पष्ट पारेको हो।

पोखरा ८, सिमलचौर निवासी ती पुरुष अघिल्लो मंगलबार घरकोठामा बेहोस अवस्थामा भेटिएपछि थप उपचारार्थ हेलिकोप्टरमार्फत काठमाडौं ह्याम्स अस्पताल पुर्याइएकोमा स्वास्थ्य तथा जनसंख्या मन्त्रालयले उनमा कोभिड–१९ पुष्टि भएको जनाएको थियो। समुदायस्तरमै कास्कीमै पहिलो पटक ती पुरुषमा कोरोना पुष्टि भएपछि एक किसिमको त्रास सिर्जना भएको थियो। जसका कारण ती संक्रमितको कन्ट्याक्ट ट्रेसिङअन्तर्गत ३९ जनाको ३ दिनअघि स्वाब संकलन गरिएको थियो।

उनीहरु सबैको रिपोर्ट नेगेटिभ आएपछि पोखरेलीमा खुसी छाएको छ। सामाजिक सञ्जालमा भने अघिल्लो रातिदेखि नै पोखरेलीको लागि खुसीको कुरा भन्दै सूचना आदानप्रदान गरेको पाइन्थ्यो । स्वास्थ्य निर्देशनालयले भने बुधबार बिहानमात्र आधिकारिकरुपमा विज्ञप्ति जारी गरी सोको पुष्टि गरेको हो। ती ६० वर्षीय संक्रमित पुरुष पेसाले अधिवक्ता र प्राध्यापक भएकोले उनको सम्पर्कमा पोखराका ‘भीआईपीहरु’ नै बढी थिए।

उनलाई २ जनाले हेलिकोप्टरमै काठमाडौं पुर्याएर सोही दिन फर्किएका थिए । पहिलो चरणमा ३९ जनाको कन्ट्याक्ट ट्रेसिङ भएकोमा आवश्यकता अनुसार अरुको पनि गरिँदै जाने स्वास्थ्य निर्देशनालयले जनाएको छ । उता, प्रदेशमा कोरोना संक्रमितको संख्या भने दिनप्रतिदिन बढ्दै गएको छ। प्रदेशमा कोरोना संक्रमितको संख्या कुल १४५ पुगेकाे छ । बुधबार थप १ मा काेराेना भेटिएकाे हाे।

गण्डकीमा मंगलबारमात्रै २४ जनामा कोरोना संक्रमण भेटिएको थियो । कुल १४५ संक्रमितमध्ये १ जनाको मृत्यु र ३ निको भएका छन् । आइतबार राति स्याङ्जा वालिङका ५८ वर्षे पुरुषको पोखरामा उपचारक्रममा मृत्यु भएको थियो । तीमध्ये कास्कीका अन्य ४ जना कोरोना संक्रमित छन् । भारतबाट आएका संक्रमित उनीहरु सबैको आइसोलेसन कक्षमा उपचार भइरहेको र स्वास्थ्य अवस्था सामान्य रहेको जनाइएको छ।