पोखरा, २६ जेठ । पोखरामा उपचार गराइरहेका कोरोना संक्रमित एक जना पुरुषको मृत्यु भएको छ।

स्याङ्जा वालिङ ३ घर भइ ४ दिनदेखि पोखरा स्वास्थ्य विज्ञान प्रतिष्ठानमा उपचार गराइरहेका ५८ वर्षीय पुरुषको आइतबार राति मृत्यु भएको गण्डकी प्रदेश स्वास्थ्य निर्देशनालयले विज्ञप्तिमार्फत पुष्टि गरेको हो।

स्वास्थ्य निर्देशक डा. विनोदबिन्दु शर्माका अनुसार ती व्यक्ति २२ जेठबाट अस्पतालको प्रि–आइसोलेसन बार्डमा रहेका र उनको पीसीआर परीक्षणमा आइतबार साँझ कोरोना पुष्टि भएपछि आइसोलेसन वार्ड सारिएको थियो।

उनको आइतबार राति ११ बजेर २५ मिनेटमा मृत्यु भएको जानकारी पोखरा स्वास्थ्य विज्ञान प्रतिष्ठानले अर्को विज्ञप्तिमार्फत जनाएको छ।

उनी किड्नी, मधुमेह लगायत रोगबाट समेत ग्रसित रहेको बताइएको छ।

योसँगै नेपालमा कोरोना संक्रमितको मृत्यु १४ पुगेको छ।