पोखरा, जेठ २५ । कोरोना संक्रमण देखिने जिल्लाको सूचीमा गोरखा पनि थपिएको छ । गोरखामा एकैदिन १० जना संक्रमित भेटिएका हुन्। गण्डकी गाउँपालिका र पालुङटार नगरपालिकामा कोरोना संक्रमण पुष्टी भएको प्रदेश स्वास्थ्य निर्देशनालयले जनाएको छ।

गण्डकी गाउँपालिकामा ९ र पालुङटारमा १ जनामा कोरोना पुष्टी भएको हो।

यस्तै, गण्डकी प्रदेशमा आइतबार ३८ जना संक्रमित थपिएका छन् । गोरखा सहित स्याङ्जा, बागलुङ र नवलपुरमा थप संक्रमित भेटिएका हुन् । स्याङ्जाका १४, बागलुङमा १० र नवलपुरमा ४ जना छन्।

स्याङ्जाको वालिङ नगरपालिकाका १३ र भिरकोट नगरपालिकाका १ जना, बागलुङको बडिगाड गाउँपालिकामा ९ र ढोरपाटनमा १ जना तथा नवलपुरको हुप्सेकोटका ४ जनामा संक्रमण देखिएको छ।

सबै संक्रमितलाई जिल्ला अस्पताल पुर्याउने तयारी भैरहेको छ । हालसम्म गण्डकीमा संक्रमितको संख्या १ सय १३ पुगेको छ।

पछिल्लो साता यो प्रदेशमा पनि संक्रमित ह्वात्तै बढेका छन् । खासगरी भारतबाट आएर क्वारेन्टाइनमा बसेकाहरुमा संक्रमण पुष्टी भएको हो।