पोखरा, १ जेठ । क्वारेन्टाइनमा राख्ने डरले घरको छतबाट हाम फालेका युवकको कोरोना संक्रमण नभएको पुष्टि भएको छ ।

भारतको कर्नाटकदेखि १२ दिन लगाएर मंगलबार पोखरा आइपुगेका २३ वर्षीय अभिषेक बस्नेतलाई क्वारेन्टाइनमा राख्न प्रहरी र स्थानीय जनप्रतिनिधि लिन आउँदा घरको छतबाट हामफालेर भाग्न खोजेका थिए । २३ वर्षका ती युवकको कोरोना संक्रमण नभएको पाइएको गण्डकी प्रदेश स्वास्थ्य निर्देशक डा. विनोद विन्दु शर्माले जानकारी दिए । उनको पश्चिमाञ्चल क्षेत्रीय अस्पतालको ल्यावमा कोरोना जाच्न स्वाब निकालिएको थियो ।

सोलुखुम्बुका उनी पोखरा महानगरपालिका वडा नं ८ मा बस्दै आएका बाबुआमाको डेरामा मंगलबार आएका थिए । उनी करिब ३ महिनाअघि भारतको कर्नाटक क्षेत्रमा कामका लागि गएका थिए । उनी भारतबाट पोखरा आएको खबरसँगै त्रसित बनेका स्थानीयले प्रहरीलाई खबर गरेका थिए । बस्नेत रोजगारीका लागि तीन महिना अघि भारत पुगेका थिए ।