पोखरा । भारतबाट मंगलबार मात्रै पोखरा आईपुगेका एक युवकको कोरोना नेगेटिभ देखिएको छ। द्रुत परीक्षण गर्दा उनको कोरोना नेगेटिभ देखिएको हो । तर थप पुष्टीका लागि पिसिआर परीक्षण हुँदैछ।

‘आरडिटी नेगेटिभ आएको छ । पिसिआर टेष्टका लागि ल्यावमा स्वाब पठाईएको छ,’ गण्डकीका स्वास्थ्य निर्देशक डा. विनोदविन्दु शर्माले भने, ‘पिसिआर टेष्टको रिजल्ट भोलि मात्रै आउँछ ।’ उनलाई अहिले क्वारेन्टाइनमा राखिएको छ।

‘आउने वित्तिकै घरमा पुगेछन् । छिमेकीले होहल्ला गर्न थालेपछि हामी पुगेर अस्पताल लगिएको हो,’ वडा नम्बर ८ का अध्यक्ष रुद्रनाथ बरालले भने, ‘एम्बुलेन्स मै हालेर क्वारेन्टाइन लगेर छोडिएको छ । अहिले समस्या छैन ।’ युवकको अवस्था सामान्य छ।

प्रहरी र जनप्रतिनिधि पुगेपछि उनी घरको छतबाटै हामफालेर भाग्न लागेका थिए । तर पछि समातेर अस्पताल लगिएको हो । मे १ तारिखमा बैंग्लोरबाट निस्किएका उनी विभिन्न गाडी फेर्दै पोखरा आईपुगेका हुन् । ‘आउन त ट्रकमै आएको हो। हैदराबादका पुलिसहरुले नै गाडी चढाएर पठाईदिए,’ उनी भन्छन्, ‘नेपाल छिर्ने बेला ड्राइभरलाई ५ सय दिएको सजिलै छिराईदियो । मुग्लिनसम्म त्यही गाडीमा आएँ । त्यसपछि मुग्लीनबाट अर्को गाडी चढेर आएको हो ।’

विभिन्न ठाउँमा स्वास्थ्य परीक्षण गर्दै आएको उनले सुनाए ।