भारतको चर्चित इण्डियन प्रिमियर लिग (आइपीएल) छोटो समयमै सक्ने गरी तयारी थालिएको छ ।

कोरोना भाइरसको महामारीका कारण लकडाउसँगै स्थगित भएको आइपीएलको आयोजनाका लागि तयारी थालिएको हो । भारतीय क्रिकेट बोर्ड (बीसीसीआई) कम समयमा धेरै खेल खेलाउदै प्रतियोगिता सम्पन्न गर्ने योजनामा छ ।

भारतीय संचार माध्यमहरुले बताएअनुसार कोराना महामारीका बीच पनि यस संस्करणको आइपीएल आयोजना गर्ने भन्ने विषयमा बीसीसीआई नियमित छलफलमा जुटेको छ ।

बोर्डका एक अधिकारीले बताए अनुसार, खेल कहिलेबाट शुरु गर्ने भन्नेबारे अझै भन्न सक्ने अबस्था छैन । कोरोनाको कारण रोकिएका क्रिकेट सिरिजमा सहभागिताका लागि दुई टोली बनाउने योजनामा बीसीसीआई रहेको छ ।

एउटाले टेष्ट श्रृंखला र अर्कोले छोटो फम्र्याटका श्रृंखला खेल्ने बताइएको छ । कोरोनाका कारण रोकिएका खेल कसरी संचालन गर्ने भनेर केही दिनअघि बीसीसीआईले अनलाइन बैठक गरेको थियो । बैठकमा अब २ टोली निर्माण गरेर अघिबढ्नुपर्ने माग उठेको थियो ।

दुई टोलीमध्ये एकले टेष्ट च्याम्पियनसीप र अर्कोले घरेलु क्रिकेटमा सहभागिता जनाउने योजना बनाउन बैठकमा धेरैले प्रस्ताव गरेको थियो । सोहीअनुसार बीसीसीआई आइपीएल सम्पन्न गर्न दुई टोली बनाएर अघि बढ्ने बिषयमा छलफल गरेको हो ।