पत्रकार स्वतन्त्र, निष्पक्ष र निर्भीक हुनुपर्छ भन्ने मान्यता धेरै पहिलेदेखिको हो । परम्परादेखि कायम हुँदै मान्यताहरुलाई कानुनसरह नै मानिएका धेरै उदाहरण छन् । तसर्थ पत्रकारिता गर्नेले स्वतन्त्र रहेर, कसैको पक्ष नलिइकन, निडरतापूर्वक सत्य–तथ्य कुरा जनसमक्ष ल्याउनुपर्दछ ।
त्यस्तै पत्रकारिता क्षेत्रमा अर्को एउटा महत्वपूर्ण नीति छ । पत्रकारले निर्वाचनमा मत दिनुबाहेक अरु कुनै पनि बेला आफ्नो राजनीतिक आस्था प्रकट गर्नुहुँदैन । मानिसको आ–आफ्नो राजनीतिक आस्था हुन्छ । उनीहरु आफ्नो राजनीतिक आस्थालाई खुला वा गोप्य मतदान प्रयोग गर्न स्वतन्त्र छन् । आफ्नो मत व्यक्त गर्न पाउनु मानिसको राजनीतिक स्वतन्त्रता हो । लोकतन्त्रमा यसको विशेष महत्व रहन्छ । तर पत्रकारिता क्षेत्रमा काम गर्नेहरुका लागि भने खुला रुपमा आफ्नो राजनीतिक मत प्रकट गर्न बन्देज रहेको छ । प्रजातान्त्रिक निर्वाचनमा मतदातालाई उत्साहित पार्नु पत्रकारको धर्म हो । तर कुनै पनि पार्टीको प्रचारमा लाग्नु पत्रकारिताको मर्यादाविपरीत हुन्छ । यो सञ्चारविज्ञहरुले नै बनाएको नीति हो, नियम हो ।
पत्रकारिताको सुरुआत चीनबाट भएको मानिए पनि पत्रकारितासम्बन्धी नीति–नियमहरुको निर्माण तथा विकास बेलायतलगायत पश्चिमी मुलुकहरुमा भएको हो । छिमेकी मुलुक भारतमा पनि पत्रकारिताको अभ्यास गहन रुपमा भएको पाइन्छ । पत्रकारले के गर्न हुने, के गर्न नहुने भन्ने कुरा अहिले सञ्चार क्षेत्रको मात्र होइन, आमजनमानसमा पनि बहस चलिरहेको छ ।
संसारकै पुरानो पूर्वीय दर्शनमा पनि स्वतन्त्र पत्रकारिताको परिकल्पना गरिएको देखिन्छ । पूर्वीय दर्शनमा पत्रकारिता क्षेत्रको कुरा गर्दा पुराणमा उल्लेख भएका नारद मुनिलाई सम्झिने गरिन्छ । देवता र दानवबीचको लडाइँमा नारदले निष्पक्ष भूमिका खेलेका थिए । उनले लडाइँमा एकअर्काले गरेका तयारीबारे दुवै पक्षलाई सु–सूचित गर्दथे । उनी आपूm देवता थिए । तर उनले देवताको पक्ष नलिई स्वतन्त्र रहे । यस्तै उनको स्वभाव थियो, स्थिर भएर नबस्ने । स्थिर भएर बस्यो भने भष्म भइन्छ भन्ने नारदलाई डर थियो । नारदका दुई कुरालाई हामीले सांकेतिक रुपमा बुझनु आवश्यक छ । एउटा हो निष्पक्षता र अर्को क्रियाशीलता । निष्पक्षता नभए पत्रकारिता हुँदैन । क्रियाशीलता नभए तथा केही नलेखी स्थिर भई बस्नु भनेको त झन् पत्रकारितालाई निस्तेज पार्नु हो । यसर्थ अहिले हामीले स्थापनाकालदेखिको पत्रकारिताको आदर्श, मूल्य र मान्यतालाई आत्मसात गरिरहेका छौं कि छैनौं भनेर गम्भीर भई सोच्नु जरुरी छ ।
राजनीति नै गर्नु छ भने खुरुक्क पार्टीमा जाँदा राम्रो नत्र कञ्चन पत्रकारितालाई धमिलो बनाउने किन?
हाम्रो देशमा प्रजातान्त्रिक अभ्यास राम्रो भई नसकेका कारण पत्रकारिताको विकास पनि हुन सकेको छैन । धेरै पत्रपत्रिका भएर, धेरै रेडियो एफएम चलेर वा टेलिभिजन आएर मात्रै पत्रकारिताको विकास भएको मान्न सकिंदैन । वास्तविक रुपमा तिनीहरुले पत्रकारिता गरिरहेका छन्/छैनन् त्यो महत्तवपूर्ण कुरा हो । सरकारको मात्र बखान गरिरहने सरकारी सञ्चार माध्यम, एउटै राजनीतिक पार्टीको मात्र बढाइचढाई गर्ने र अर्को पार्टीको खेदो खन्ने पत्रपत्रिका, एफएम वा टेलिभिजनलाई पत्रकारिता गरेको कसरी भन्ने ? त्यो त पत्रकारिता नभएर पार्टीकारिता हो । राजनीति नै गर्नु छ भने खुरुक्क पार्टीमा जाँदा राम्रो नत्र कञ्चन पत्रकारितालाई धमिलो बनाउने किन?
अहिले हाम्रो देशमा यस्तै पार्टीकारिताको दबदबा छ । उनीहरु नै आपूmलाई असली पत्रकार भएको दाबी गर्दछन् । पत्रिका, एफएम, टिभीका सम्पादक, सञ्चालक रहेका उनीहरु पार्टीको झण्डामात्र बोक्दैनन्, पार्टीका प्रवक्ता र पार्टी प्रमुखका निजी सचिव भएर पनि काम गरिरहेका छन् । त्यतिमात्र नभएर पत्रकारका नाममा खोलिएका संघसंगठनका महत्वपूर्ण पद ओगट्न पुग्छन् ।
धन्दा अरु भए पनि पत्रकारकै नाममा देश–विदेश घुम्छन् । पत्रकारिता क्षेत्रमा यहाँभन्दा उदेकलाग्दो कुरा के होला ? वास्तविक पत्रकारहरुलाई त्यस्ता व्यक्तिहरु रहेको सञ्चार संस्थामा बसेर काम गर्नुपर्दा कति पीडाबोध होला? स्वतन्त्र भएकै कारण राज्यले पत्रकारका लागि दिएको सेवासुविधा, तालिम र पुरस्कारबाट समेत बञ्चित गरिनु खेदजनक कुरा हो ।
अझ चर्को दमन त त्यहाँ हुन्छ, जब स्वतन्त्र पत्रकारकै खेदो खन्न थालिन्छ । पत्रकार महासंघ आपूmले पाइरहेको भाग लुटिने हो कि भन्ने डरले कोलाहलसमेत मच्चाउँछन् । तर स्वतन्त्र पत्रकारमा न पदलोलुपता हुन्छ, न पैसाका लागि मरिहत्ते गर्ने आदत । उनीहरु स्वतन्त्र, निष्पक्ष र निर्भीक पत्रकारितामै सन्टुष्टि लिन्छन्, रमाउँछन् । समाजलाई सुसूचित गरेर बस्नुजस्तो ठूलो सम्मान र आनन्द अरु के होला? पत्रकारका लागि आफ्नो पद संसारकै सबै पदभन्दा उच्च छ । संसारका अरु जति उच्च पदवाला हुन्, ती सबै पत्रकारका निगरानीमा हुन्छन् । दायाँबायाँ गर्ने बित्तिकै पत्रकारका कलमले तिनलाई नांगेझार पार्न सक्छ । यस्तो शक्तिशाली एवं गरिमामय पेसा अँगालेकाहरु अहिले किन चाटुकारितामा निर्लिप्त छन् ? यसको खोजी गरेर पत्रकारिताको मर्यादा बचाउनु आजको आवश्यकता हो । पत्रकारिता क्षेत्रमा शुद्धीकरण गरी हाल घट्दै गइरहेको सञ्चारकर्मीप्रतिको विश्वास र सञ्चार माध्यमप्रतिको आकर्षण बढाउनु जरुरी छ ।
(लेखक स्वतन्त्र पत्रकार संघ, नेपालका संस्थापक अध्यक्ष हुन् ।)
Related News
सम्बन्धित समाचार
‘स्व’ को खोजीमा प्रतीक्षा
गण्डकीमा विपद् जोखिमको अवस्था, पूर्वतयारी र न्यूनीकरण
नमच्चिने पिङको सय झड्का (हास्यव्यङ्ग्य निबन्ध)
बालकथा : मौकाको साटो
बुद्ध जयन्ती – एक चर्चा बुद्धशिक्षाको
hero news full width
मुख्य समाचार
गायक तथा गीतकार एलपी जोशी रहेनन्
आज मौद्रिक नीति सार्वजनिक हुँदै
श्रावण ११, २०८१पोखराको गन्नीलाई रनिङ सिल्ड
श्रावण १०, २०८१लीलादेवी बनिन् पहिलो महिला मुख्यसचिव
श्रावण १०, २०८१राइड सेयरिङविरुद्ध पोखराका यातायात व्यवसायीको आन्दोलन
श्रावण १०, २०८१जहाज सि चेकका लागि पोखरा आउँदै थियो
श्रावण ९, २०८१