राजधानीमा अपत्यारिलो घटना, बैंकको रकम जोगाउन जोडिहाल्नुस् एसएमएस सेवा

नारायण ढुङ्गाना, रासस
मंसिर १२, २०७६
janata bank scam

तपाई बैंकको एसएसएस सेवा लिन छुटाउनु भएको त छैन? छुटाएको भए तत्कालै जोडिहाल्नुस्। नत्र बैंकको मौज्दात रकम अरु कसैले लगिसकेको हुन सक्छ। यसरी लगेको पैसा न बैंकलाई थाहा हुन्छ न तपाईलाई।

काठमाडौंमा यस्तै एउटा ठूलो घटना सार्वजनिक भएको छ। जुन तपाईले पत्याउनै सक्नुहुन्न। रकम सुरक्षित हुन्छ र चाहेको बेलामा निकाल्न पाइन्छ भनेर ढुक्कसँग बैंकमा पैसा राखिन्छ तर बैंकको कर्मचारीको लापर्वाहीले त्यो पैसा सजिलै अर्कैले निकालेर लान्छ। बैंकको सेवामा प्रश्न चिह्न लाग्ने गरी एउटा गिरोहले यसैगरी अर्कै व्यक्तिको खातामा रहेको झण्डै २० लाख नगद निकाल्न सफल भएको छ। कुनै प्रविधिको प्रयोग विनै चेकमार्फत यसरी सजिलै पैसा निकालेर लगिन्छ भने अब बैंकलाई कसरी विश्वास गर्ने? गम्भिर प्रश्न खडा भएको छ।

चिनियाँ ह्याकरले एटिएमको स्वीच ह्याक गरेर गत भदौमा करोडौ रकम निकालेका थिए। कृषि विकास बैंक र पानस रेमिटको सफ्वेयर ह्याक गरेर असोजमा ६५ लाख निकालिएको थियो। उनीहरुको ५ अर्ब निकाल्ने योजना प्रहरीको सक्रियताले विफल भएको थियो। उक्त घटनामा संलग्न चिनियाँसहित नेपाली अहिले पनि पुर्पक्षका लागि थुनामा छन्।

प्रविधिको प्रयोग बढेसँगै बैंकिङ प्रणालीमाथि नै प्रश्न चिह्न लाग्ने गरी भएको घटना सेलाउन नपाउँदै प्रविधिको उपयोग नगरी खातावालको कीर्ते हस्ताक्षर गरेर उसैको नाममा नयाँ चेकबुक बनाई पैसा निकालिएको घटना सार्वजनिक भएको छ। खातावालाले एसएसएम सेवा प्रयोग गर्दा पैसामात्रै जोगिएन गिरोह नै पक्राउ परे।

घटना आइतबारको भए पनि महानगरीय प्रहरी परिसर काठमाडौंले बुधबार सार्वजनिक गर्दै फरक खालको गिरोह देखिएको जनाएको छ। उक्त घटनामा संलग्न छ जनालाई पक्राउ गरी उनीहरुबाट १८ लाख ५० हजार बरामद गरिएको छ भने केही पैसा उनीहरुबीच बाँडेको फेला परेको छ।

यसरी भएको थियो घटना

आइतबार दिउँसो २ बजे जनता बैंक ग्वार्को शाखामा गोपालमान राजवाहकको नाममा चेकबुक हराएको भन्दै नयाँ चेकबुक बनाउन निवेदन आयो। बैंकका कर्मचारीले २:३० बजे सजिलै चेकबुक बनाएर पठाइदिए। त्यहीँ शाखाबाट पैसा निकाल्दा शङ्का हुने देखेर उक्त गिरोहले दिउँसो ३:३० बजे बानेश्वरस्थित उक्त बैंकको शाखाबाट चेकमार्फत ९ लाख ९९ हजार पैसा निकाले। दिउँसोको काउण्टर बन्द भएपछि साँझ २ चेकमार्फत उनीहरुले राजवाहककै खातबाट ५/५ लाख नगद निकाले।

यसरी क्रमैसँग पैसा निकालेको एसएमएस आउँदा राजवाहक दङ्ग भए। “कसैलाई चेक दिएकै छैन, एटिएम कार्ड पनि दिएको छैन कसरी पैसा निस्कियो”, चकित परे। उक्त एसएसएससहित राजवाहक महानगरीय प्रहरी पसिरको सम्पर्कमा आए। तत्कालै प्रहरी हाइअलर्ट भयो। उनीहरुको निगरानी शुरु भयो। सबै बैंकलाई सर्कुलर गरेर प्रहरीले त्यस्ता व्याक्ति आउने बित्तिकै खबर गर्न भनियो। राजवाहकको खातामा ५ लाख बाँकी रहेको थाहा पाएका गिरोह भोलिपल्ट सोमबार त्यसैगरी ३ चेक बनाएर बैंकबाट पैसा निकाल्ने क्रममा न्यूरोडबाट पक्राउ गर्न सफल भएको परिसरका वरिष्ठ प्रहरी उपरीक्षक उत्तमराज सुवेदीले बताए।

पक्राउ पर्नेमा काभ्रेपलाञ्चोक पाँचखाल घर भई कालीमाटी बस्दै आएका १९ वर्षका सुवास श्रेष्ठ, सोही ठाउँ बस्ने १९ वर्षका कुमार तामाङ, १८ वर्षका मनिष घिमिरे, २१ वर्षका अञ्जन बराल, बाग्लुङ गलकोटका २५ वर्षीय सुमन पौडेल र सिन्धुपाल्चोक ज्यामिरे घर भई काठमाडौं बस्ने ३० वर्षका गोविन्द घिमिरे रहेका छन्। उनीहरुलाई बैंकिङ कसुरमा मुद्दा दर्ता गरी अनुसन्धान थालिएको परिसरले जनाएको छ। उनीहरुको साथबाट प्रहरीले नगद १८ हजार ५ सय सहित विभिन्न व्यक्तिको नागरिकताको प्रतिलिपि २ सय ९० थान, सयौँ व्यक्तिको बैंकमा रहेको रकम उल्लेख भएको २६ वटा हाजिरीखाता खोल्न फोटो टाँसेको फारम ३ सय वटा, विभिन्न व्यक्तिको बैंक स्टेटमेन्ट १ सय ९५ वटा, विभिन्न व्यक्तिको नाममा जनता बैंकको ५७ वटा चेकबुक बरामद गरिएको छ।

यस्तै ज्योति बैंक, एभरेष्ट बैंक, माछापुच्छ्रे बैंक, मुक्तिनाथ बैंक, एनआइसी एशिया बैंकका दर्जनौँ चेकबुक पनि फेला परेको छ। उनीहरुका साथबाट ८ सय २५ जनाको फोटो, एनआइसी एशिया बैंकको ८२ वटा र अन्य बैंकको सात गरी ८९ वटा एक्टिभ भएको एटिएम कार्ड फेला परेको छ। रकम उल्लेख गरेर साट्न ठिक्क पारिएको अवस्थाको ३ सय २९ वटा चेक पनि बरामद गरिएको प्रहरीले जनाएको छ। परिसरका प्रहरी नायब उपरीक्षक होबिन्द्र बोगटी उनीहरुले खातावालाको सबै विवरण पहिचान गरेर नक्कली हस्ताक्षर दुरुस्त पारी रकम निकाल्ने गरेको पाइएको बताए।

“सामान्य दुई/तीन लाख पैसा निकाल्दा नै बैंकले खातावालालाई फोन गर्छ, तर यहाँ झण्डै १० लाख निकाल्दा पनि खातावालाई जानकारी नहुनुले कर्मचारीको मिलेमतोको आशंकामा अनुसन्धान जारी छ”, बोगटीले भने। उनका अनुसार दिनभरि गतिविधि गर्ने र रातिमा उनीहरुले नक्कली हस्ताक्षर बनाउन सिक्ने गरेका थिए।

हस्ताक्षर बनाउन प्रयोग भएका दर्जनौँ हाजिरीखातासमेत बरामद भएको छ। उनले केही कागजातको अनुसन्धान भइरहेको र अझै दुई बोरा कागज हेर्न बाँकी नै रहेको बताए। अहिले एक व्यक्तिको मात्रै पैसा लगेको पाइएकाले उनीहरुले अन्य धेरै व्यक्तिको रकम लगेको हुनसक्ने आशङ्का प्रहरीको छ।

Related News

सम्बन्धित समाचार

  • दलित महिलाको सशक्तीकरण जरूरी : प्रदेश प्रमुख भट्ट

    आदर्श समाज सम्वाददाता असार ६, २०८१
    पोखरा । गण्डकी प्रदेश प्रमुख डिल्लीराज भट्टले विभेदको दोहोरो शोषणमा परेका दलित महिलाको सशक्तिकरण जरूरी रहेको बताएका छन् । दलित…
  • प्राइम सहकारी ठगीमा थुनछेक बहस सुरु

    विजय नेपाल असार ६, २०८१
    पोखरा । डेढ अर्बभन्दा बढी रकम अपचलन भएको प्राइम बहुउद्देश्यीय सहकारी संस्था ठगी मुद्दामा बहस सुरु भएको छ । नेपाल…
  • मनाइयो पहिलो दिनको बकर इद

    आदर्श समाज सम्वाददाता असार ४, २०८१
    पोखरा । मुस्लिम धर्मावलम्बीको दोस्रो महान पर्व बकर इद (इदुल जोहा) सोमबार देशभरका मस्जिदमा नमाज पाठ गरी हर्षोल्लासपूर्वक मनाइएको छ…
  • दृष्टिका लागि ठिक्क पावरको चस्मा हुनुपर्छ

    डिल्लीराम सुवेदी असार ४, २०८१
    निकै थोरै समय र राजनीतिक रस्साकस्सीको बीचमा आएको यो नीति तथा कार्यक्रम सन्तुलित देखिन्छ । यसले अलिकति सपना पनि देखेको…
  • किन घटेर आयो गण्डकीको बजेट ?

    आदर्श समाज सम्वाददाता असार ४, २०८१
    पोखरा । चालु आर्थिक वर्षमा सरकारले प्रक्षेपण गरेमध्ये संघ सरकारले दिने भनेको १ अर्ब ९८ करोड रुपैयाँ समानीकरण अनुदान पठाएको…

hero news full width