पोखरा । पोखरा चिसाखोला वेद विद्याश्रमले रजत महोत्सव सन्दर्भमा प्रदेशव्यापी खुला छन्दोबद्ध कविता प्रतियोगिता भएको छ । प्रतियोगितामा संगम बस्याल प्रथम हुँदै ११ हजार रुपैयाँ पुरस्कार प्राप्त गरेका छन् ।

यस्तै, निकेश गिरी द्वितीय, नवराज अधिकारी तृतीय र सुशीला पौडेल पहारी सान्त्वना भए । उनीहरुले क्रमश ८ हजार, ५ हजार र ३ हजार साथमा प्रमाणपत्र पाए ।
सो अवसरमा वेद विद्याश्रमको रजत स्मारिका विमोचन आगामी २८ वैशाखमा हुनेछ । साथै ९० वर्ष पुगेका ११ जेष्ठ नागरिकलाई १ हजार ५ सय, सम्मानपत्र र दोसल्लाद्वारा सम्मान गरिएको छ ।

कार्यक्रममा कविता प्रतियोगिताका संयोजक प्राडा जगन्नाथ रेग्मीले वैदिक धर्मसंस्कार र छन्द बचाउन वेद विद्याश्रमको भूमिकाको प्रशंसा गरे । छन्द बचाऊँ अभियानका संयोजक माधव वियोगीले शास्त्रीय छन्द लोप हुने अवस्थामा आफूले चालेको अभियानका बारेमा प्रकाश पार्दै अब छन्द लोप नहुनेमा आफू विश्वस्त रहेको बताए ।

चर्चित कविता वाचक उपप्राध्यापक शिव त्रिपाठीले छन्द कविता वाचनले आफूलाई स्वर्गानुभूति हुने भन्दै यस्ता कार्यक्रमले शास्त्रीय छन्द बचाउन मद्दत पुग्ने बताए ।

वेद विद्याश्रमका प्रमुख संरक्षक मोक्षनाथ तिमिल्सिनाले वेद विद्याश्रम औपचारिक स्थापनाको २५ औं वर्षसम्म तन, मन, धन, वचनद्वारा सहयोग गर्ने सम्पूर्णमा धन्यवाद दिए ।
कार्यक्रममा प्राडा बलराम उपाध्याय रेग्मी लगायतले आफ्नो मन्तव्य, अप्रतियोगी रुपमा विद्यार्थी पीताम्बर पौडेल, ओमप्रकाश पोख्रेल लगायतले कविता वाचन गरे । कार्य समिति अध्यक्ष मणिरत्न अधिकारीको अध्यक्षतामा भएको कार्यक्रमको सञ्चालन वेद विद्याश्रमका सचिव गंगासागर उपाध्यायले गरेका थिए ।