पोखरा । ढोलाहिटी फ्रिडमले दोस्रो एबिसी फोर्टी फाइभ प्लस एट ए साइड भेट्रान्स फुटबल प्रतियोगिताको उपाधि रक्षा गरेको छ । हेटौडा भेट्रान्सलाई ४—२ गोलअन्तरले पराजित गर्दै डिफेन्डिङ च्याम्पियन ढोलाहिटीले उपाधिसहित १ लाख ५५ हजार ५ सय ५५ सिल्ड, मेडल र प्रमाणपत्र हात पारेको छ । उपविजेतामा सीमित हेटौडाले ७७ हजार ७ सय ७७ पुरस्कार प्राप्त गरेको छ ।

ढोलाहिटीका प्रकाश रानामगर म्यान अफ दी म्याच चुनिए । ढोलाहिटीकै तेजबहादुर गलामी उत्कृष्ट खेलाडी घोषित हुँदै ११० हजार हात पारे ।

फाइनलमा ढोलाहिटीतर्फबाट प्रकाश रानामगरले २ गोल र सरोज थापा र राजकुमार केसीले १—१ गोल गरे । हेटौडाका लागि शशि गौतम र सञ्जय रानामगरले गोल गरे ।

विजयीलाई गण्डकी प्रदेश सभा सदस्य सरस्वती गुरुङ, अमरसिंह ब्वाइज क्लब एबिसी अध्यक्ष राजेश गुरुङ लगायतले नगद, सिल्ड, मेडल, ट्रफी र प्रमाणपत्र प्रदान गरे ।

गण्डकी प्रदेश सभा सदस्य सरस्वती गुरुङले सरकारी स्तरबाट खेलकुदको विकासका लागि उल्लेख्य काम हुन नसकेको बताउँदै खेलकुदको विकासका लागि स्थानीय क्लब, संघसंस्था, व्यक्तित्वको साथ र सहयोग अपरिहार्य रहेको बताइन् ।

अमरसिंह ब्वाइज क्लब अध्यक्ष राजेश गुरुङले आफूहरुले ४५ वर्ष उमेर कटेका लक्षित गरी आपसी भाइचारा कायम गरी शारीरिक तन्दुरुस्तीका लागि सहयोग प¥याउने उद्देश्यले खेलकुदको कार्यक्रम गर्दै आएको र आगामी दिनमा पनि निरन्तरता दिने बताए ।