पोखरा । पोखराका समाजसेवी एवं व्यवसायी बिलबहादुर गुरुङको निधन भएको छ । उनको ९१ वर्षको उमेरमा काठमाडौं ग्रान्डी अस्पतालमा मंगलबार राति निधन भयो । उनी पछिल्लो समय निमोनियाबाट पीडित थिए ।

पेटको सामान्यले मणिपाल अस्पताल लगिएकोमा थप उपचारार्थ ९ दिनअघि ग्रान्डी लगिएको थियो ।

स्व. गुरुङको बुधबार बौद्ध अर्घौ सदनमा अन्त्येष्टि भयो । उनका २ श्रीमती, ३ छोरा, २ छोरी छन् ।प्रदेश खेलकुद परिषद् गण्डकीका सल्लाहकार सुनिल गुरुङ उनका सुपुत्र हुन् ।

बिलबहादुर विभिन्न संघसंस्थामा क्रियाशील थिए । उनी पेट्रोलियम डिलर्स एसोसियसन गण्डकीका संस्थापक अध्यक्ष हुन् । पोखरा बौद्ध अघौं सदन उनकै परिकल्पना हो । सदनका संस्थापक सचिव एवं अध्यक्ष हुँदै हाल सल्लाकार थिए । पोखराको कालिका मावि विद्यालय व्यवस्थापन समिति अध्यक्ष, पोखरा उद्योग वाणिज्य संघ सदस्य भएर काम गरेका उनी मनकामना पेट्रोल पम्प, जय बुद्ध आयल स्टोर्सको सञ्चालक हुन् ।

अर्घौं सदन स्थापना गरेर उनले एकातिर गुरुङहरूको अर्घौं, अन्त्येष्टि आदि कार्यमा सुविधा र सहुलियत उपलव्ध गराएका थिए भने अर्कोतिर बुद्धधर्मको विकासमा सघाउ पु¥याएका थिए ।

उनी विश्वशान्ति स्तुपको कार्यसमिति र बुद्ध जयन्ती समारोह समितिको अध्यक्ष भएर पनि काम गरे । उनी धर्मकाय बौद्ध मण्डलामा आवद्ध भएर पनि अमूल्य सल्लाह सुझाव दिएका थिए । उनलाई संघसंस्थाका अक्षयकोष दाताका रुपमा स्मरण गरिन्छ ।
आफ्नो जन्मस्थल फेदीखोला–५, स्याङ्जामा विद्यालय स्थापना र अन्य सामाजिक काम गरेर नाम कमाएका थिए भने कर्मथलो पोखराको शैक्षिक र सामाजिक विकासमा उत्तिकै योगदान गरेका छन् ।