पोखरा । कास्की जिल्ला टेनिस संघको आयोजना तथा रेवान पोखराको मुख्य प्रायोजनमा पोखरा रंगशालामा रेवान पोखरा भेट्रान्स टेनिस प्रतियोगिता हुने भएको छ ।
३५ वर्षमाथि सिनियर भेट्रान्स तथा भेट्रान्स विगिनर गरी २ इभेन्टमा प्रतिस्पर्धा हुने आयोजक संघका सचिव नविन श्रेष्ठले जानकारी दिए । नवप्रवेशितर्फको भेट्रान्स प्रतिस्पर्धा फागुण ८ देखि हुनेछ । त्यस्तै फागुण १० देखि सिनियरतर्फको प्रतिस्पर्धा सुरु हुनेछ । नवप्रवेशितर्फका सेमिफाइनलिष्टले सिनियरतर्फको मुख्य प्रतिस्पर्धामा भाग लिन पाउने आयोजक संघले जनाएको छ । प्रतियोगितामा खुला एकलतर्फका विजेताले नगद १५ हजार तथा दोश्रो हुनेले नगद ७ हजार ५ सय सहित ट्रफि पुरस्कार प्राप्त गर्नेछन् ।
डबल्सतर्फ विजेताले १० हजार तथा उपविजेताले ५ हजार सहित ट्रफि पुरस्कार प्राप्त गर्नेछन् । नवप्रवेशितर्फका विजेता र उपविजेताले ट्रफी पुरस्कार प्राप्त गर्नेछन् । फागुन १४ सम्म चल्ने प्रतियोगिताका लागि आयोजक संघले शक्ति शर्मालाई टुर्नामेन्ट डाइरेक्टरमा चयन गरेको रेवान पोखराका अध्यक्ष लक्ष्मण बरालले जानकारी दिए । खेलकुदमार्फत पर्यटन प्रवद्र्धनका लागि टेनिसलाई सहयोग गरेको उनको भनाइ छ ।