‘मन भए धनको के खाँचो’ भन्ने भनाइलाई सार्थक पार्दै पोखरा ३०, खुँदी निवासी मित्रलाल लामछिानेले लेखनाथ सामुदायिक लायन्स अस्पतालमा दृष्टिविहीनको उपचारका लागि १ लाख ५ हजार रुपैयाको अक्षय कोष स्थापना गरेका छन्।

सामान्य बिरामी भएर उपचारका लागि अस्पताल आएका लामिछानेले अस्पतालको सेवाबाट खुसी हुँदै अस्पतालप्रति सामाजिक भावना जगाउने उद्देश्यले अक्षय कोष स्थापना गरेका हुन्। उनले अक्षय कोष रकम अस्पतालका अध्यक्ष मेजर रामप्रसाद गुरुङलाई हस्तान्तरण गरेका थिए।

उमेरले ८१ वर्ष नाघे पनि सामाजिक कामका लागि अघि सर्ने लामिछानेले आर्थिक अभावका कारण कुनै पनि दृष्टिविहीन उपचारबाट वञ्चित हुन नपरोस् भन्ने उद्देश्यले अक्षय कोष शुरु गरेको बताए।

लामिछानेले प्रदान गरेको अक्षय कोषमा अन्य स्रोतबाट थप रकम व्यवस्था गरी त्यसको ब्याज रकमबाट अस्पतालमा आखाँ उपचारको लागि आउने बिपन्न बिरामीको उपचार गरिने अस्पतालका अध्यक्ष मेजर रामप्रसाद गुरुङले जानकारी दिएका छन्।

कार्यक्रममा अस्पतालका मेडिकल सुपरिटेन्डेन्ट डा प्रकाश भट्टराइले अस्पतालमा दिनहुँ बिरामीको चाप बढी रहेको र यस्ता सहयोगबाट अस्पतालमा आउने गरीब बिरामीको उपचारमा सहयोग पुग्ने उल्लेख गरे

महायज्ञबाट संकलित सहयोग रकमबाट २०६० सालमा स्थापना गरिएको अस्पतालले २४ सैं घण्टा मेडिकल अधिकृत सहित विशेषज्ञ सेवा दिइरहेको छ। अस्पतालमा आईसियु, अप्रेशन कक्ष र प्रसूति सेवा संचालनको तयारीमा छ।