हेमजा, १६ फागुन। अन्नपूर्ण गाउँपालिका–२ स्थित नागडाँडाहुँदै सेराचौर जोड्ने ग्रामीण सडकअन्तर्गत स्तरउन्नति कार्य जारी रहेको छ।

गण्डकी प्रदेश सरकारको ५० लाख तथा गाउँपालिकाको २० लाख सहयोगबाट सो बाटो ढलान गरी यस वर्ष स्तरोन्नति गरिँदै छ।

स्थानीय जिरो किलोमिटरबाट शिव मन्दिरसम्मको कुल ७ सय ६५ मिटर बाटो ढलान गर्न लागिएको हो।

जसमध्ये बिहीबारसम्म दुई सय ५० मिटर बाटो ढलान गरिएको वडाध्यक्ष चूडामणि अधिकारीले जानकारी दिए।

बाटो ४ मिटर चाक्लो ढलान गरिएको छ। माघ ४ गतेबाट शुरु उक्त कार्य फागुन मसान्त वा चैतको पहिलो हप्तासम्म सम्पन्न गर्ने योजना निर्माण समितिले जनाएको छ।

आगामी १ वर्षभित्र सेराचौर गाउँसम्म नै ढलान बाटो पुर्याउने योजना पनि रहेको छ।

सो बाटोबाट सेराचौर, सौरेनी तथा नयाँगाउँ गरी करिब एक सय ६० घरधुरी प्रत्यक्ष लाभान्वित हुने वडाध्यक्ष अधिकारीले बताए।