आलु गाउँको पहिचान संकटमा

आदर्श समाज सम्वाददाता
फागुन १३, २०७४

हेमजा, १२ फागुन। बसाइँ सरी आउने मानिसको संख्या तीव्र रुपमा वृद्धिसँगै आलु गाउँका रुपमा परिचित हेमजा क्षेत्रको पहिचान नै संकटमा पर्नेमा चिन्ता व्यक्त गरिएको छ।

हेमजा सिंचाइ प्रणाली जल उपभोक्ता संघको दसौं साधारणसभा तथा उपभोक्ता भेलामा बोल्ने वक्ताले सो चिन्ता जाहेर गरेका हुन्।

क्षेत्रीय सिंचाइ निर्देशनालय पोखराका निर्देशक शिशिर कोइरालाले मानिसको चापका कारण हेमजा क्षेत्रको अधिकांश खेतीयोग्य जमिनमा आरसीसी ठूलाठूला घर ठडिन थालेको पाइएको भन्दै खेतीयोग्य जमिनमा गरिने प्लटिङ तुरुन्त रोक्नुपर्नेमा जोड दिए।

उनले व्यङ्ग्यात्मक शैलीमा हेमजामा आलु एवं अन्य तरकारीभन्दा पनि घर छिटो फल्ने बताए । यस्तो प्रवृत्ति केही वर्ष कायमै रहे आलु गाउँको पहिचान नामेट हुने उनको चिन्ता छ ।

उनले अब हेमजावासी आफ्नै उत्पादनमा रम्नुपर्नेमा जोड दिँदै हेमजाका सिंचाइ नहरलाई स्थानीयले आफ्नो जीविकोपार्जनसँग जोड्नुपर्ने आवश्यकता औल्याए।

सिंचाइ डिभिजन कार्यालय पोखराका डिई तुलसीराम भट्टराईले हेमजा सिंचाइ प्रणालीले शाखा विस्तार गरी आफ्नो सिंचित क्षेत्र बढाउनुपर्ने बताए।

उनले हेमजा सिंचाइ प्रणाली जल उपभोक्ता संघ मार्फत कृषि सहकारी सञ्चालन गरिनुपर्ने जनाउँदै संघले सिंचाइसँग सम्बन्धित विषयलाई एकीकृत गरी विकास गर्दै लैजानुपर्ने र हेमजालाई कृषि पर्यटनको हवका रुपमा विकास गरिनुपर्ने तर्क अगाडि सारे।

पोखरा २५ का वडाध्यक्ष शोभाकर तिम्सिनाले हेमजामा पानीको समानुपातिक वितरण प्रणलीमा जोड दिए।

उनले हेमजामा भएका अन्नपूर्ण र चौरासी नहरको सदुपयोग गरी हेमजावासीले आफ्नो जीवनस्तर उकास्नुपर्ने बताए ।

उनले हाल हेमजामा भइरहेको सडक विस्तार कार्य व्यवस्थित हिसाबले सम्पन्न गर्न वडाले पहल जारी राखेको स्पष्ट पारे। उनले आगामी ५ वर्षभित्र वडाका अधिकांश सडक पिच गरिने आवश्वास समेत दिए।

संघका सल्लाहकार दानबहादुर थापाले जीर्ण नहरको स्तरोन्नतिमा जोड दिँदै स्थानीय नहरको प्रयोग गरेर स्थानीयवासी पालिएको भन्दै ती नहर बालबालिका पाल्ने अभिभावकसँग तुलना गरे।

नेपाली काँग्रेस हेमजाका संयोजक मधुसुदन त्रिपाठीले आफूहरुले कुटो, कोदालो र फालीको प्रयोग गरी नहर निर्माण गरेर हेमजालाई आलु गाउँको रुपमा चिनाउन सहयोग गरेको बताए।

गौरीशंकर बहुमुखी क्याम्पसका क्याम्पस प्रमुख ओमबहादुर कुँवरले अझै पनि हेमजाको आधा क्षेत्र सिंचाइबाट टाढा रहेको टिप्पणी गर्दै नहरको शाखा विस्तारमा जोड दिए।

संघका अध्यक्ष कृष्णबहादुर थापाको अध्यक्षतामा सम्पन्न उक्त कार्यक्रममा उपाध्यक्ष दुर्गाप्रसाद तिम्सिनाले स्वागत र सचिव घनश्याम तिम्सिनाले सञ्चालन गरेका थिए। संघमा हाल ४ सय ८५ घरधुरी उपभोक्ता आवद्घ छन्।

कार्यक्रममा सचिव तिम्सिनाले प्रगति प्रतिवेदन तथा कोषाध्यक्ष भगवती बचगाईले आर्थिक प्रतिवेदन प्रस्तुत गरेका थिए ।

Related News

सम्बन्धित समाचार

  • गौरीशंकरमा रेडक्रस अभिमुखीकरण

    आदर्श समाज सम्वाददाता असाेज १०, २०८०
    पोखरा । पोखरा–२५, हेमजास्थित गौरीशंकर बहुमुखी क्याम्पसमा मंगलबार रेडक्रस अभिमुखीकरण तथा डेंगु सचेतना भएको छ । क्याम्पसस्थित युवा रेडक्रस सर्कलको…
  • मनिपाल घटनापछि प्रदेशभर ओपिडी सेवा ठप्प

    आदर्श समाज सम्वाददाता असाेज १०, २०८०
    पोखरा । लमजुङको सुन्दरबजार नगरपालिका ६ की ५७ वर्षीय सुकमाया दुराको मनिपाल शिक्षण अस्पतालमा सोमबार उपचारक्रममा मृत्यु भयो । श्वासप्रश्वास…
  • ब्युटीपार्लर एसोसिएसनको संयुक्त सभा

    आदर्श समाज सम्वाददाता असाेज ९, २०८०
    पोखरा । ब्युटीपार्लर एसोसिएसन गण्डकी, कास्की र लेखनाथको आइतबार संयुक्त रुपमा साधारणसभा भयो । आर्थिक समृद्धिका लागि सौदन्र्य पेसा आजको…
  • पोखरामा खटिए नयाँ नगर प्रहरी

    आदर्श समाज सम्वाददाता असाेज ८, २०८०
    पोखरा । पोखरा महानगरपालिकामा नयाँ भर्ना भएका नगर प्रहरी सोमबारदेखि कार्यक्षेत्र प्रवेश गरेका छन् । महानगरले ४८ जना नगर प्रहरीहरु…
  • नौविसे ओख्लेडाँडा टोलमा ठाकुर

    आदर्श समाज सम्वाददाता असाेज ८, २०८०
    लेखनाथ । नौविसे ओख्लेडाँडा टोल विकास संस्था पोखरा–२९ को अध्यक्षमा ठाकुरप्रसाद घिमिरे चयन भए । संस्थाको १३ औं साधारण सभा…

hero news full width