शपथ हतारोले फाष्टट्रयाकमा मर्मत

आदर्श समाज सम्वाददाता
माघ ७, २०७४
pradesh pramukh in pokhara

पोखरा, ६ माघ । तालिम र सभा सम्मेलनका लागि बनाइएको पोखराको नदीपुरस्थित नगर प्रशिक्षण केन्द्र अब सांसदको भेला हुने ठाउँ बनेको छ । २०२८ सालमा नगर प्रशिक्षण केन्द्रका भवनहरु निर्माण भएपछि २०४९ सालमा सभाहल बनेको थियो ।

तत्कालीन प्रधानमन्त्री स्व. गिरीजाप्रसाद कोइरालाले उद्घाटन गरेको सभाहल २५ वर्षपछि संघीय संरचना अनुसार प्रदेशसभामा परिणत भएको छ । सामान्य टुटफुट मर्मत गरिए पनि निर्माणकै बेलादेखि यहाँका भवनहरु मर्मत सम्भार भएका छैनन् । तर राज्यको पुनर्ःसंरचनाले लामो समयपछि नगरविकास प्रशिक्षण केन्द्र रंगिएको छ । यहाँको चहलपहल बढेको छ भने सुरक्षा व्यवस्था पनि कडा पारिएको छ । देश संघीय संरचनामा गएपछि आवश्यक पर्ने प्रादेशिक कार्यालय खोज्ने क्रममा प्रादेशिक संरचना सिफारिस समितिले नगर प्रशिक्षण केन्द्रलाई प्रदेशसभा र सचिवालयका लागि उपयुक्त भनि सिफारिस पठाएको थियो । सोही सिफारिसका आधारमा अहिले मर्मत सम्भार थालिएको क्षेत्रीय प्रशासक लक्ष्मणप्रसाद अर्यालले जानकारी दिए ।

‘आइतबार प्रदेशका सांसदज्यूको शपथको कार्यक्रम छ । सरकारको निर्णय ढिलो भएका कारण काममा हतारो पनि बढी छ’-उनले भने-‘आइतबारदेखि नगर प्रशिक्षण केन्द्र प्रदेशसभाको रुपमा स्थापित हुनेछ ।’ यो भवन नेपाल सरकार र संघीय गणतन्त्र जर्मन सरकार (जिटी जेड) को संयुक्त सहयोगमा निर्माण गरिएको हो ।

प्रदेश प्रमुखको नियुक्ति र अस्थायी केन्द्र तोकिएपछि पोखरामा प्रादेशिक कार्यालय धमाधम मर्मत भैरहेका छन् । प्रदेश प्रमुखको कार्यालय र प्रदेशसभा कार्यालयको मर्मत र सरसफाईमा पूरै शक्ति खटिएको छ । अध्यागमन कार्यालयलाई पर्यटन कार्यालयमा सारेर त्यहाँ प्रदेश प्रमुखको कार्यालय स्थापना गरिएको छ । रंगरोगन सहित आवश्यक फर्निचरको व्यवस्था मिलाइएको छ । अध्यागमन कार्यालयको साईनबोर्ड हटाएर प्रदेशप्रमुखको कार्यालय लेखिएको साईनबोर्ड टाँसिएको छ ।

उता, प्रदेश सांसदलाई शपथ खुवाउने कार्यालय नगर प्रशिक्षण केन्द्रमा पनि अत्यावश्यक व्यवस्थापनको काम भैरहेको छ । शनिबार दिनभर रंगरोगन र स्टेज तथा कुर्चीको व्यवस्था मिलाइएको र बाँकी काम आइतबार बिहानै हुने प्रमुख जिल्ला अधिकारी तारानाथ अधिकारीले जानकारी दिए । सहज जनसम्पर्क हुन सक्ने, सुरक्षाका दृष्टिले सहज तथा भौतिक पूर्वाधारलाई मुख्य आधार बनाएर प्रदेशका कार्यालय व्यवस्थापन गरिएको उनको भनाइ छ । ‘सबै काम हतारमै भैरहेका छन् । तर हतारो देखाएर व्यवस्थापनमा कुनै कमजोरी भएको छैन’-उनले भने-‘प्रदेश प्रमुखको कार्यालय लगभग तयार भएको छ । प्रदेशसभा आइतबार बिहानै रेडी हुन्छ ।’

गत बुधबार अस्थायी केन्द्र र प्रदेश प्रमुख तोकेपछि पोखराभित्र रहेका सरकारी कार्यालय भवनमै प्रदेशका आवश्यक सबै कार्यालयहरु राख्ने तयारी गरिएको हो । मुख्यमन्त्री, प्रदेशप्रमुख लगायत आवश्यक सबै मन्त्रालयहरु साविकका सरकारी भवनमै रहनेछन् । प्रदेशसभाको पहिलो बैठक बसेको २० दिनभित्रै मुख्यमन्त्री निर्वाचित हुनेछन् । त्यसपछि मन्त्रीमण्डल विस्तार हुनेछ । मुख्यमन्त्री र अन्य मन्त्रालयहरुको व्यवस्थापन पनि थप चुनौती छ । जिल्ला समन्वय समितिमा मुख्यमन्त्री र अरु क्षेत्रीय तथा जिल्लास्तरका कार्यालयहरुमा सम्भावित मन्त्रालय राख्ने गरी तयारी भैरहेको छ । यसको सबै रुपरेखा समितिले सरकारलाई बुझाएर मर्मत खर्च समेत मागेको छ । तत्कालको मर्मतका लागि २८ करोड मागिए पनि हालसम्म बजेट निकासा नभएको क्षेत्रीय प्रशासन कार्यालयले जनाएको छ ।

के हुन्छ मनाङ्गेको शपथ ?

प्रदेश सांसदले आइतबार शपथ लिँदा मनाङबाट निर्वाचित सांसद दीपक मनाङ्गे भने सहभागी हुने छैनन् । सवोर्च्च अदालतले अपराधी ठहर गरी ५ वर्ष कैद सजाय सुनाएका कारण उनी सहभागी नहुने सम्भावना छ । यद्यपि अदालती काजगात निर्वाचन आयोगमा नपुगेका कारण शपथका लागि खबर गरिएको क्षेत्रीय निर्वाचन कार्यालय पोखराले जनाएको छ । तर उनी शपथका लागि आए पनि प्रहरीलाई दीपक मनाङ्गे पक्राउ गर्ने आदेश भएका कारण शपथ अघि नै प्रहरीले पक्राउ गर्ने बुझिएको छ । ‘शपथका लागि सांसदकै हैसियतले वहाँलाई खबर पुगेको छ’-श्रोतले भन्यो-‘प्रहरी पक्राउ पुर्जी लिएर बसेका कारण शपथ अघि नै पक्राउ गर्ने सम्भावना छ ।’

शपथपछि तत्काल उनलाई पक्रिन कानुनले पनि अवरोध मान्छ । त्यसैले झन्झट नहुँदै पक्राउ गर्ने प्रहरीको तयारीका कारण उनी यहाँ आउने सम्भावना नरहेको श्रोतको भनाइ छ ।

Related News

सम्बन्धित समाचार

  • अमरसिंह माविको ६८ औं वार्षिकोत्सव

    आदर्श समाज सम्वाददाता चैत्र १४, २०८०
    पोखरा । अमरसिंह माध्यमिक विद्यालय नमूना रहेको चर्चा गरिएको छ । पोखरा–१२, रामघाट स्थित विद्यालयको मंगलवार भएको ६८ औं वार्षिकोत्सव, अभिभावक…
  • लायन्स लेखनाथमा कृष्णप्रसाद

    आदर्श समाज सम्वाददाता चैत्र १३, २०८०
    लेखनाथ । लायन्स क्लब अफ लेखनाथको २५ औं शाखा अधिवेशनले वर्ष २०२४/२५ का लागि कृष्णप्रसाद तिमिल्सेनालाई अध्यक्षका लागि चयन गरेको…
  • ‘ज्येष्ठ नागरिकलाई सम्मान गरौं’

    आदर्श समाज सम्वाददाता चैत्र १३, २०८०
    पोखरा । ज्येष्ठ नागरिकलाई सम्मान गर्नुपर्नेमा जोड दिइएको छ । ज्येष्ठ नागरिक मञ्च पोखरा ८ तथा वडा कार्यालयको संयुक्त आयोजनामा…
  • फेवा महोत्सवमा ड्यामसाइडमा पनि विविध गतिविधि

    आदर्श समाज सम्वाददाता चैत्र १३, २०८०
    पोखरा। १९ औं फेवा नव वर्ष महोत्सवलाई पर्यटकीय राजधानीको इज्जत धान्ने गरी नयाँपन प्रदान गर्न विभिन्न संघसंस्थाले सुझाव दिएका छन्…
  • ‘मादलको घिन्ताङ गुञ्जाउँछौं सराङकोट’

    आदर्श समाज सम्वाददाता चैत्र १३, २०८०
    पोखरा । पोखरा–१८, सराङकोटका महिला दिदीबहिनीहरुले आफूहरु स्वावलम्बनको मार्गमा अघि बढिरहेको बताएका छन् । वडा कार्यालयको आयोजनामा भएको महिला सशक्तीकरण…

hero news full width