पोखरा, ४ माघ।  राष्ट्रिय परोपकार महासंघ नेपाल स्थापनाको एक दशक अवसरमा आयोजित श्रीमद्भागवत माघेसंक्रान्ति महाउत्सव-२०७४ बिहीबार सम्पन्न भएको छ । कार्यक्रमबाट २९ लाख रुपैयाँ आर्थिक संकलन भएको महासंघका महासचिव विष्णुप्रसाद पौडेलले जानकारी दिए।

महाउत्सव गत पुस २७ देखि ढुंगेसाँघुस्थित महासंघको केन्द्रीय कार्यालय तथा विद्याश्रममा भएको थियो । जसमा संस्थाका अध्यक्ष युवापण्डित भागवत्भाष्कर कमलनयन गौतमले कथावाचन गरेका थिए ।

महासचिव पौडेलका अनुसार यस वर्ष पोखरा-८ का प्रेम जिसी र कृष्ण थापासहित महासंघमा ३० जना नयाँ अक्षयकोषदाता थापिएका छन्। महासंघद्वारा स्थापित अक्षयकोषमा सहयोग गर्नेमा हालसम्म १ सय १६ जना अक्षयकोषदाता र ३५ सय आजीवन सदस्य छन्।

गुरुकुल वेद विद्याश्रममा कक्षा ६ देखि १० कक्षासम्म र तनहुँको परासर आश्रममा ६ र ७ कक्षासम्म अध्ययन अध्यापन हुँदैआएको छ । उक्त आश्रममा ज्येष्ठ नागरिकलाई समेत राखिएको छ ।

त्यसैगरी, महासंघले पर्वतको सहस्रधारा व्यवस्थापनको पूर्ण जिम्मेवारी लिएको छ। पर्वतकै राममन्दिरको पूर्ण व्यवस्थापन गर्दै आएको छ भने उक्त क्षेत्रमा ज्येष्ठ नागरिकलाई आश्रममा राखेको छ।

महासंघले नवलपरासीको अमलटारीमा स्थानीय नगरपालिका र वडाबाट प्राप्त जग्गामा गौरक्षा अभियान सञ्चालन गर्नुको साथै ज्येष्ठ नागरिक आश्रम सञ्चालन गर्ने भएको छ।

पोखरा १४, बेलचौतारास्थित सिद्धेश्वर महादेव मन्दिर र वडा १५, लक्ष्मीनारायण मन्दिरमा २ सय जना ज्येष्ठ नागरिकको दिवा सेवाका लागि व्यवस्थापन गर्ने महासंघले लक्ष्य लिएको महासंघ अध्यक्ष युवापण्डित गौतमले बताए।