पोखरा, २९ पुस। नेपाल निर्माण व्यवसायी संघ कास्कीले ३१ औँ स्थापना दिवसको अवसरमा शनिवार आयोजना गरेको खुला रक्तदान कार्यक्रममा ३६ युनिट रगत संकलन भएको छ।

कार्यक्रमका प्रमुख अतिथि निर्माण व्यवसायी महासंघका केन्द्रीय सल्लाहकार शिवशंकर गौचनले पहिलो रक्तदाता संघका सदस्य तथा पोखरा लेखनाथ महानगरपालिका वडा नं ८ का महिला वडासदस्य किरण गौतमलाई व्लड व्याग हस्तान्तरण गरेर कार्यक्रम उद्घाटन गरे।

गौचनले पछिल्लो समय देशभर छड तथा सिमेन्टमा चरम मूल्यवृद्धि भएकोले निर्माण कार्यमा कठिनाई भएकाले मूल्यवृद्धि फिर्ता नलिइए आन्दोलनमासमेत जाने चेतावनी दिए।

संघका अध्यक्ष वासुदेव गौचनको अध्यक्षतामा भएको कार्यक्रममा संघका पूर्व अध्यक्ष तथा सल्लाहकार अर्जुनबहादुर क्षेत्री तथा क्षेत्रीय निर्माण व्यवसायी संघका अध्यक्ष ओमप्रसाद गौचनले भनाइ राखे।

वरिष्ठ उपाध्यक्ष सुरेश श्रेष्ठले स्वागत गरेको कार्यक्रमको सञ्चालन सचिव हरिप्रसाद लम्सालले गरेका थिए। संघले हरेक वर्ष स्थापना दिवस रक्तदानलगायत सामाजिक उत्तरदायित्वका कार्यक्रम गरेर मनाउँदै आएको संघका कार्यालय प्रमुख डम्वरराज ढकालले बताए।

रक्तसंचार केन्द्र पोखराले कार्यक्रममा प्राविधिक सहयोग गरेको थियो।