१. कास्की कारागारमा जबरजस्ती करणी मुद्दाका थुनुवा र कैदीको संख्या सबैभन्दा बढी देखिएको छ । प्रायः लागु औषध सम्बन्धि मुद्दाका कैदी बढी रहने गरेको कास्कीमा यतिखेर जवरजस्ती करणीका मुद्दाका थुनुवाको संख्या उच्च रहेको हो । कुल ९ सय १९ कैदी र थुनुवा रहेको कास्की कारागारमा लागु औषधका २ सय ३६ र जवरजस्ती करणीका २ सय ४५ जना रहेको जनाईएको छ ।

२. नेपालको मुलुकी अपराध संहिता–२०७४ परिच्छेद १८ मा जवरजस्ती करणी सम्बन्धि कानूनी व्यवस्था छ । सो कानून बनेपछि जवरजस्ती करणीको मुद्दामा सजायँ भोग्नेको संख्या बढेको मानिएको छ । तथापि, अहिले समाजमा नै यौन दूराचारका घटनाहरु बढिरहेको पाइन्छ । त्यसै कारणले पनि मुद्दा खेप्नेको संख्या बढेको हो ।

३. कोरोना संक्रमण नियन्त्रणका लागि बनाइएका क्वारेन्टिन भित्रै पनि बलात्कारका घटना भएका छन् । हालै सुरक्षा निकायका उच्च पदाधिकारी समेत जवरजस्ती करणीमा पक्राउ परे । यी यस्ता घटनाले यौन दूराचार कति फैलिरहेको क, अनुमान गर्न सकिन्छ । सामाजिक लोकलाजका कारण पनि कतिपय घटनाहरु उजागर हुन सकेका छैनन् ।

४. मानिसको आफ्नो शरीरमाथि आफ्नै अधिकार हुन्छ । त्यसैले उसको इच्छा विपरित कसैले पनि उसको शरीरको उपभोग गर्न पाउँदैन । गरे जवरजस्ती ठहरिन्छ, त्यो अपराध मानिन्छ । कति महिलाहरुले आफ्नै श्रीमान् विरुद्ध पनि जवरजस्ती करणीको मुद्दा गरेका छन् । यसलाई साहस नै मान्नुपर्छ । अपराधीहरुले छुट पाउनु हुदैन ।

५. यौन दूराचारीहरुलाई कानून अनुसार सजाय गर्ने कुरा त छदैछ । यस्ता घटना हुन नदिन सावधानी अपनाउन पनि जरुरी छ । यस सम्बन्धि समाजमा सचेतना जगाउनु पर्छ । मानव अधिकारका बारेमा ज्ञान दिनुपर्दछ । मानिसको कर्तव्य, नैतिकताबारे सजगता अपनाउनु पर्दछ । समाजमा अनुशासन नहुँदा विभिन्न विकृति विसंगति देखा पर्छन् । त्यसमा सरकार हमेशा सजग रहनुपर्दछ ।