कामप्रतिको सम्मान

Avatar सम्पादक
पौष ३, २०७७

कास्की, स्याङ्जा र पर्वत संगमस्थल पञ्चासे टाकुरामा ‘पञ्चासेका पिता’ भनेर चिनिएका सामाजिक अभियन्ता गोपाल गुरुङको हालै अर्धकदको प्रतिमा निर्माण गरिएको छ । सामाजिक अभियन्ता गुरुङको त्यो प्रतिमा उनकै नाममा त्यहाँ निर्मित पञ्चासे सुनाखरी गोपाल गुरुङ स्मृति पार्कमा अनावरण गरिएको छ । सामाजिक अभियन्ता गुरुङले सञ्चासेको एकीकृत विकास र गुरुयोजना तयार गराउनमा महत्वपूर्ण भूमिका खेलेका थिए । उनले रातदिन नभनी त्यो काममा लागिपरेकाले पञ्चासेमा मानिसहरुको ध्यान आकर्षिक भएको थियो । अहिले पञ्चासे पर्यटकीय गन्तव्य रुपमा स्थापित भएको छ ।

पञ्चासे डाँडामा ५ वटा टाकुराहरु छन् । कहिले नसुक्ने र फोहोर नहुने पोखरी छ । धार्मिक दृष्टिले हेर्ने हो भने त्यहाँ महादेवको मन्दिर छ । प्रसिद्ध सिद्धबाबाको स्थान छ । केही वर्ष बुद्धको मूर्ति पनि स्थापना गरिएको छ । बुद्धको मूर्ति राखिएपछि त्यस ठाउँलाई धार्मिक सहिष्णुता प्रतीक रुपमा पनि हेर्ने गरिएको छ । त्यहाँ पुरानो भग्नावशेष छ । त्यो भग्नावशेषले त्यस ठाउँ पुरातत्विक दृष्टिकोणले पनि महत्वको छ भनेर प्रष्ट संकेत गर्दछ । त्यहाँ धेरै किसिमका फूलहरु पाइन्छन् । त्यसमा सुनाखरी विशेष मानिन्छ । जडिबुटीका लागि पनि पञ्चासे चर्चित छ । सतुवा, पाँचऔले, सर्पको मकै जस्तो महत्वपूर्ण वनस्पितले विशेषज्ञहरुको ध्यान आकर्षिक गरेको छ । त्यहाँ धेरैले धेरै अध्ययन र अनुसन्धान गरेका छन् । अत्यन्त दुर्लभ भनिने सुसाइ चरा पनि पाइन्छ ।

यस्तो महत्वपूर्ण ठाउँ भएर पनि यो ठाउँ ओझेलमा परेको थियो । सामाजिक अभियन्ता गोपाल गुरुङ र उनका साथी र सहयोगीको प्रयासले पञ्चासेले काँचुली फेरे झैं भएको छ । त्यहाँ परिवर्तन भएको छ । विकास भएको छ र त्योभन्दा ठूलो कुरा धेरैभन्दा धेरैको ध्यान आकर्षित भएको छ । पञ्चासेमा जाने सिँढीहरु छन् । जुन सिँढीहरु ४० वर्षपहिले उनै गोपाल गुरुङले बनाएका हुन् । सिँढी बनाउने अभियानले धेरै समय खायो । तर, ती बनेपछि मानिसको आवागमन बढ्यो र पर्यटकीय गन्तव्य रुपमा चिनारी भयो । अहिले त्यहाँ केही न केही काम भइरहेको हामी पाउँछौं । गोपाल गुरुङले पञ्चासे विकासको लागि अथक परिश्रम गरे । आफू बिरामी भएको बेला पनि उनले त्यसको चिन्तन मनन गर्दथे । त्यहाँको काम पूरा गर्न नपाएकामा चिन्तित हुन्थे । उनी विकासप्रति संवेदनशील थिए । आर्थर डाँडाखर्कको अध्यक्ष भएको बेलामा पनि त्यस्तै काम गरेका थिए । उनले ५० हजार बिरुपा रोपेर वातावरण संरक्षण गरेको कुरा चर्चित छ । सामाजिक काममा त्यसरी निरन्तर लागिपर्ने गुरुङको प्रतिमा स्थापना गर्नुलाई कामप्रतिको सम्मान रुपमा हेरिएको छ ।