१. पोखरा महानगरपालिकाले बुधबार आ.व. ०७७/७८ को नीति तथा कार्यक्रम सार्वजनिक गर्‍यो । आगामी वर्षका लािग ६ अर्व १९ करोड ७१ लाख ३८ हजारको बजेट ल्याइएको छ । त्यसमध्ये चालु खर्चतर्फ ३ अर्व २० करोड ८४ र पूँजीगत खर्च तर्फ २ अर्व ९८ करोड ८८ लाख छुट्टाइएको छ । गत वर्ष ७ अर्व ५४ लाखको बजेट ल्याइएको थियो ।

२. वजेटमा सबैभन्दा बढी रकम सडक र पुल निर्माणका लागि छुट्टाइएको छ । सडकमा ६५ करोड र पुलका लागि १३ करोड रकम राखिएको हो । सहरी सडक कंक्रिट देखि लिएर विजयपुर देखि माझठाना, पामे–घाँटीछिना, फूलबारी–स्यालेचौर, कालिकाचोकबाट थुम सडक निर्माण गरिने भएको छ । महेन्द्रपुलमा आकासेपुल निर्माण गरिने छ । यसैगरी एडिवीको सहयोगमा तालचोक–वेगनास ताल सडक, गण्डकी प्रदेश सरकारसँगको सहकार्यमा परेका बसपार्क र लेखनाथको लामेआहाल वसपार्क निर्माण योजना राखिएको छ । साथै वडाका कार्यक्रमहरु सम्पन्न गर्न २३ करोड छुट्टाइएको छ ।

३. पूर्वाधारतर्फ २ अर्व ७३ करोड छुट्टाइएको महानगरले स्वास्थ्य क्षेत्र कोरोना विशेष कार्यक्रमका लागि २८ करोड, कोरोना विशेष रोजगारीका लागि ३ करोड बजेट रहेको छ । पर्यटन क्षेत्र विकासका लागि २ करोड विनियोजन गरिएको छ । यसैगरी जनस्वास्थ्य कार्यक्रम, ५० शैयाको सरुवा रोग अस्पताल निर्माण सम्भाव्यता अध्ययन कार्यक्रम, संघीय सरकारसँगको सहकार्यमा कृषि तथा पशु विकास कार्यक्रम पनि रहेका छन् ।

४. महानगरले ल्याएको नीति तथा कार्यक्रममा अधिकांश पुरानै योजना रहेका छन् । लकडाउनबाट पीडितहरुका लागि ३ महिनाको घरभाडा र वहालकर छुट गरिएको छ । यसैगरी ग्रामीण क्षेत्रको नक्सा पास गर्दा ५० प्रतिशत छुट, अपाङ्गता भएका, पिछडिएका तथा महिलाले व्यवसाय दर्ता तथा कृषि व्यवसायका लागि पनि ३० प्रतिशत छुट गरिएको छ । लकडाउनमा घरभाडा छुट गर्ने घरधनीले घर वहाल कर पुरै छुट पाउने छन् ।

५. कोरोना संक्रमणका कारण भएको लकडाउनबाट परेको असरमा राहत पुग्ने खालको ठोस कार्यक्रम नरहेको र पर्यटन क्षेत्रको विकासमा पनि बजेट सीमित रहेको छ । बजेट धेरै ठाउँमा छर्नुको सट्टा प्राथमिकता क्षेत्रहरु छुट्टाएर योजनालाई समयमै पुरा गर्ने तर्फ ध्यान दिनु पर्दछ । नगरको विकासको लागि अत्यावश्यक कुराहरुमा दृष्टि पु¥याई त्यस अनुरुप कार्यक्रम पारित गर्न नगरसभासदहरुको भूमिका हुनुपर्दछ ।