लोकतान्त्रिक पद्धतिमा चुनावलाई त्यसको सुन्दर पक्ष मानिन्छ । त्यो यति सुन्दर हुन्छ कि त्यसले मतदातालाई सधैं आकर्षित बनाउँछ । जनप्रतिनिधि र सरकारले राम्रो काम गर्न नसकेर आलोच्य भएको बेला मतदाता आफैं निराश हुन्छन् । निराश भएका मतदाताले आक्रोशित भएर कहिलेकाहीं चुनाव पद्धतिको औचित्यमाथि नै प्रश्न उठाउँछन् र चुनाव बहिष्कार गर्ने धम्की दिने गर्दछन् । जब चुनाव नजिक आउँछ, राजनीतिक पार्टी र नेताहरुले घोषणापत्रको नाममा प्रतिज्ञापत्रको नाममा देशको विकास गर्ने र जनताको भनाइअनुसार काम गर्ने मीठो र आकर्षक भाषामा आश्वासन दिन्छन्, त्यस्तो आश्वासन र उम्मेदवारको नम्र र मिजासिलो बोलीमा विश्वास गरेर मतदाताहरु फेरि उत्साही भएर मतदानमा सहभागी हुन्छन् र आफ्नो उम्मेदवारलाई मतदान गर्दछन् ।

यस पटकको चुनावभन्दा पहिले पनि मतदाताहरु आफ्नो जनप्रतिनिधिप्रति आक्रोशित थिए । पुराना नेताहरुको आलोचना भएको थियो र तिनीहरुबाट अब काम चल्दैन भनेर नयाँ पार्टी र युवाहरु चुनावमा उल्लेख्य मात्रामा देखापरे । तिनीहरुले चुनावमा राम्रो नतिजा पनि ल्याए । जनतामा एउटा आशाको सञ्चार भयो । नयाँ जनप्रतिनिधिले नयाँ ढंगले काम गर्नेहरु भनेर अपेक्षा गरिएको छ । सरकारमा नयाँ प्रतिभाहरुको प्रवेश भएको छ र सरकार गठन भएको धेरै भएको पनि छैन । त्यस हिसाबले सरकारको काम कुराबारे केही भन्ने बेला भएको छैन । सरकार गठन भएको थोरै समयमा नै राजनीतिमा जुन खटपट सुरु भएको छ, त्यसले राम्रो संकेत दिएको छैन । सत्ता साझेदार पार्टीहरुमा समेत विवाद खडा भएको छ । यत्तिसम्म कि केही पार्टीले सरकारलाई दिएको समर्थनसमेत फिर्ता गर्ने धम्की दिएका छन् ।

देशमा संघीयता कायम भएपछि हामीसँग ३ तहको सरकार छन् । तर ती सरकारले जिम्मेवारीपूर्वक काम गरेको भने देखिएको छैन । एउटा सानो किसानको समस्यामा पनि तिनीहरुले समन्वय स्थापित गरेर काम नगर्दा नयाँ पुस्ताका कहाँ गए भन्ने प्रश्न उब्जिएको छ । हिजो पनि किसानले आफ्नो उत्पादनले बजार पाएन भनेर गुनासो गरेका थिए भने अहिले पनि गुनासो गरेर गोलभेँडा, काउली आदि बजारमा फालेर असन्तोष जाहेर गरेको देख्नु परेको छ । त्यो किसानको समस्या ठूलो होइन, सानो प्रयासले पनि त्यसको समाधान हुन सक्छ । तर कुनै पनि सरकारले त्यसको प्रयास नै गरेनन् । जिम्मेवारी पन्छाउने गरिएबाट किसानहरु आक्रोशित भएका हुन् । किसानहरु एक त बिचौलियाको शोषणमा परेका छन् भने अर्को भारतीय बजारबाट खुला रुपले ती सामानहरु आउने गरेकाले समस्या उत्पन्न भएको हो । यी कुरालाई बुझेर छिटो समस्याको समाधान गर्नुपर्नेमा हामी जोड दिन चाहन्छौं ।