१. दुई तिहाई बहुमत ल्याएर सत्तामा पुगेको नेपाल कम्यूनिष्ट पार्टी अहिले आएर पार्टी विभाजन हुन सक्ने सम्मको अवस्थामा पुगेको छ । पार्टीका दुई नेता प्रधानमन्त्री तथा अध्यक्ष केपी ओली तथा अर्का अध्यक्ष प्रचण्ड बीच यता केही दिनदेखि नियमित छलफल भईरहेपछि सकारात्मक सन्देश आएको छैन । असार १६ गते सो पार्टीको केन्द्रीय कमिटि वैठकमा अधिकांश नेताले प्रधानमन्त्री ओलीको राजिनामा मागेपछि विवाद चर्किएको हो ।

२. दुइ नेता बीचको छलफलमा पनि प्रचण्डबाट प्रधानमन्त्रीको राजिनामा मागिएको तर प्रधानमन्त्री ओली अध्यक्ष सहित दुवै पद नछाड्ने अडानमा रहेको भन्ने चर्चा आएको छ । दुवै पक्षबीचको अडानले निकाश पाउन सकेको छैन । आलोपालो गरेर प्रधानमन्त्री चलाउने भनी जेठ २ गते भएको सम्झौता छाडेर आफुले भूल गरेको भन्दै पश्चाताप व्यक्त गरेका प्रचण्ड आफै प्रधानमन्त्री बन्न चाहेको बुझिन्छ ।

३. यता केपी शर्मा ओली नेतृत्वको सरकार ढाल्न पाइदैन भन्दै सडकमा प्रदर्शन भईरहेको छ । प्रधानमन्त्री ओलीको समर्थनमा निस्केको ¥यालीमा ‘भारतीय दलाल मुर्दावाद’ का नारा लगाइएको छ । भारतीय दवावमै प्रधानमन्त्रीको राजिनामाको माग आएको आरोप प्रधानमन्त्रीले लगाउँदै आएका छन् । आफुहरुलाई भारतीय दलालको आरोप लगाइएको भन्दै अन्त्य नेताहरुले आपत्ति जनाएका छन् ।

४. सत्तापक्षीय पार्टी नेकपा भित्रको विवाद अहिले कसैका लागि रुचिकर बनेको छैन । राजनीतिक स्थायित्व पाउन नसकेर बारम्बार पीडा भोगिरहेको यो मुलुकमा अहिले वहुमत पाएको पार्टीले पनि आफ्नो अस्तित्व कायम गर्न नसक्दा देशको भविष्य के होला भनी सबैलाई चिन्तित बनाएको छ । मध्यावधी चुनाव हुने स्थिति नआओस् ।

५. प्रतिपक्ष पार्टीहरुले समेत नेकपालाई पार्टी भित्रको विवाद टुङ्गाउन सुझाव दिइरहेका छन् । नेकपाले नै पाँचवर्ष राम्रो सरकार चलाओस् भन्ने सबैको चाहना छ । पार्टी फुटबाट जोगाउनुपर्छ भनेर आवाज उठिरहेको छ । नेताहरु व्यक्तिगत स्वार्थबाट माथि उठ्न सक्छन् कि सक्दैनन् परीक्षाको घडी छ ।