नेकपा एमालेका अध्यक्ष तथा प्रधानमन्त्री केपी ओलीले फेरि अर्काे झटारो हानेका छन् । यस पटक उनको झटारो आफ्नै पार्टीका नेताहरु माधव नेपाल र झलनाथ खनाल समूहमाथि बज्रेको छ । सर्वाेच्च अदालतले आफ्नो एक निर्णयमा ती नेतालाई आफ्नो पुरानो पार्टी नेकपा एमाले फर्कन आदेश दिएको थियो । त्यो आदेशअनुसार नेताहरुले त्यो पार्टीलाई ब्युताएर के कसरी सञ्चालन गर्लान् भनी उत्सुकतापूर्वक हेरिरहेका बेला अनपेक्षित रुपले झटारो प्रयोग गरिएको छ । एउटा बैठकसमेत नबसीकन पार्टीका अध्यक्षको हैसियतले उनले आफू इतरका विभागीय प्रमुखलाई तिनीहरुको जिम्मेवारीबाट हटाएका छन् । यसले पार्टीभित्र गम्भीर संकट उत्पन्न भएको छ ।

माधव नेपाल पक्षधरले ओलीको यो निर्णयलाई विधान विपरीत र हास्यास्पद भनेका छन् । उनको त्यो निर्णयले एकातिर आफू इतरकालाई जिम्मेवारीबाट हटाएका छन् भने अर्काेतिर उनको नजिक आएका पूर्व माओवादीलाई केन्द्रीय सदस्य बनाएर जिम्मेवारी पनि सुम्पेका छन् । उनले २३ जना माओवादीमा नफर्कीएका नेतालाई आफ्नो पार्टीमा समाहित गरेका छन् । माओवादीका २३ मध्येका नेतामा गृहमन्त्री रामबहादुर थापा बादल, लेखराज भट्ट, मणि थापा लगायतका छन् । तिनीहरु ओली पक्षमा रहनुलाई पनि अनपेक्षित मानिएको छ ।

सर्वाेच्च अदालतका आदेशबाट राजनीतिले एउटा कोर्स समात्छ र राजनीति स्पष्ट हुन्छ भन्ने जुन आशा थियो, त्यो आशा पनि धमिलिंदै गएको छ । प्रधानमन्त्री ओलीले निर्धक्कसाथ आफ्ना विरोधीलाई बल मिचाइ गरी प्रहार गरिहेका छन् भने उनका इतरका पार्टीहरु उनको विकल्पमा सरकार बनाउन प्रयास गरिरहेका छन् । गत चुनावमा कम्युनिस्ट पार्टीले जितेको र झण्डै दुई तिहाइ बहुमतको सरकार गठन हूुँदा कसैले यस्तो दूरावस्थाको परिकल्पना गरेका थिएनन् । नेताहरुले त्यो पार्टी र सरकारको प्रशंसा गरेर अनेक उदाहरण दिने गरेका थिए । तिनीहरुले त्यो पार्टीलाई इस्पातले बनेको पार्टी कहिले फुट्दैनसमेत भनेका थिए । तर आजसम्म स्थिति ठीक विपरीत भएको छ । तिनै नेताहरु आज एकले अर्काेलाई सकेम्म कडा शब्दमा गाली गलौज गर्दैछन् । हिलो छ्यापाछ्याप गर्दैछन् । निन्दा र भत्र्सना गर्दैछन् ।