१. पूर्वी नवलपरासी अर्थात् नवलपुरको रजहरस्थित प्राकृतिक चिकित्सालयमा उपचाररत रहेका कोरोना संक्रमितहरु निको भए पछि नाच्दै गाउँदै रमाउँदै घर फर्किएको समाचारले उत्साह थपिएको छ । कोरोना विरुद्धको लडाई जितेका उनीहरुलाई विदाई गर्न मुख्यमन्त्री पृथ्वीसुब्बा गुरुङ स्वयम् त्यहाँ पुगेका थिए । उक्त चिकित्सालयमा रहेका संक्रमितहरु मध्ये २३ जना शनिबार निको भई घर फर्किएका हुन् ।

२. संक्रमणबाट निको भई घर फर्किनेमा ५ वर्षीय बालक पनि छन् । नवलपुरमा संक्रमित ३ सय २७ मध्ये ३ सय ६ जना निको भएर घर फर्किएका छन् । त्यस क्षेत्र कोरोना संक्रमितहरुको उपचार प्राकृतिक चिकित्सालयमा भईरहेको छ । योग तथा प्राकृतिक उपचारका माध्यमबाट पनि कोरोना संक्रमण कम गर्न सकिन्छ भन्ने उदाहरण उक्त चिकित्सालयले दिएको छ ।

३. प्राकृतिक चिकित्सालयमा प्राप्त सेवा सुविधाप्रति विरामीहरुले सन्तोष व्यक्त गरेका छन् । त्यहाँका स्वास्थ्यकर्मीले गरेको सेवाको पनि प्रशंसा गरेका छन् । धेरै ठाउँमा विरामीहरुले स्वास्थ्यकर्मीको मुख देख्न नपाइएको र कहिलेकाँही फोनमा मात्र कुरा हुने गरेको गुनासो रहेको पाइन्छ । स्वास्थ्यकर्मीहरु नै संक्रमणबाट त्रसित भएका कारण विरामीले चाहेजस्तो सेवा प्राप्त नभएको पनि हुनसक्छ ।

४. कोरोना संक्रमणको महामारी बढिरहेको छ । लकडाउन खुलेपछि भीडभाड बढ्दै जाँदा संक्रमितको संख्या बढ्दै गएको हो । चाडबाडहरु पनि सुरु भएकाले मानिसहरु बीच भेटघाट बढी हुँदा पनि संक्रमण फैलिन सक्दछ । कहिँ कतै औपचारिक कार्यक्रमहरु पनि भईरहेका छन् ।

५. मानिसहरुमा स्वास्थ्य सचेतना नहुँदा तथा लापरवाही गरिँदा संक्रमण बढ्दछ । अहिले गरिएको सानो गल्तीले पनि भोलि उग्ररुप लिन सक्छ । आफू पनि बाँचौं र अरुलाई पनि बचाऊँ भन्ने मूलमन्त्रलाई व्यवहारमा उतार्नु सबैको कर्तव्य हो, जिम्मेवारी हो । कोरोनासँगको लडाई जितेरै अगाडी बढ्ने प्रतिबद्धता हामी सबैको हुनुपर्छ ।