काहूँकोटमा अन्तर्क्रिया

सम्पादक
श्रावण ६, २०७९

काहूँकोट पर्यटकीयस्थल हो । पोखरा बजारदेखि नजिकै भए तापनि र पोखरा महानगरपालिकाले आफूमा समाहित गरेको भए तापनि यसको समुचित विकास भएको छैन । यसले पर्यटकलाई त्यत्ति आकर्षित गर्न सकेको छैन । पोखरामा पर्यटकको चहलपहल हुनुअघि नै यसलाई पर्यटकीयस्थल बनाउने जमर्को गरिएको थियो । त्यसको लागि २०२० सालतिरै काहूँकोटमा भ्यू टावर निर्माण गरिएको थियो र पर्यटकलाई घोडा चढाएर वरिपरिको रमणीय दृश्यावलोकन गराउँदै कोटमा पुर्‍याउने लक्ष्य राखिएको थियो । काहूँकोटमा भ्यू टावर निर्माण गर्दा सराङकोट र कास्कीकोटमा त्यस्तो कुनै भौतिक संरचना निर्माण भएकै थिएन । तर समयको क्रममा काहूँकोट धेरै पछि परेको महसुस गर्नुपरेको छ । तर समय सधैं एउटै हुँदैन । यसले धेरैलाई आकर्षित गर्दछ र धेरैको ध्यान काहूँकोटमा पुग्दैछ । स्थानीय जनताले यस क्षेत्रमा चहलपहल बढाउन प्रदर्शनी र मेला पनि आयोजना गरेका थिए ।

केही वर्षदेखि काहूँकोटको नामसँग जोडिएर एउटा भरोसालाग्दो बौद्ध परियोजना धम्मकाय बुद्ध मण्डला आउँदै छ । यो परियोजनाअन्तर्गत शाक्यमुनि बुद्धको विशालकाय मूर्ति निर्माण हुँदैछ । ध्यान भावना केन्द्रलगायत पर्यटकलाई आकर्षित गर्ने संरचना र स्थलहरु निर्माण हुँदैछन् । यसको गुरुयोजना तयार भई प्रारम्भिक कार्य सुरु भएको छ । यो महत्वाकांक्षी योजना हो । यो सिद्धाउने निश्चय नै केही वर्ष लाग्नेछ तर सिद्धिए पनि त्यो ठाउँको महत्व नै अर्को हुनेछ । पर्यटनविद्हरु र बौद्ध धर्मावलम्वीहरु यस क्षेत्रलाई के–कसरी आकर्षक र महत्वपूर्ण बनाउने भनेर लागिपरेका छन् । नेपालमा बौद्ध सर्किटको अवधारणा आएको छ । प्रस्तावित बौद्ध सर्किट निर्माण भएमा यो स्थल पनि त्यसमा जोडिने छ । यसको महत्व अरु बढ्ने छ ।

धम्मकाय बुद्ध मण्डलामा बौद्ध कार्यक्रम बराबर हुने गरेका छन् । त्यसको अतिरिक्त अन्य कार्यहरु पनि आयोजना गर्ने गरिएको छ । यसैक्रममा स्वतन्त्र पत्रकार संघ नेपालले त्यही स्थलमा पुगेर साउन ६ र ७ गते काहूँकोटको पर्यटकीय सम्भावनाका विषयमा बृहत् अन्तक्र्रियाको आयोजना गर्दैछ । स्वतन्त्र पत्रकार संघको जिल्ला अध्यक्ष र सचिवहरु तथा केन्द्रीय सदस्यहरु सहभागी भएर गरिने कार्यक्रमलाई महत्वका साथ हेरिएको छ । कार्यक्रममा त्यस स्थलको पर्यटकीय आकर्षणका सम्पदाबारे जानकारी दिने, स्थानीय समस्याको पहिचान गर्ने, सञ्चारकर्मीले खेल्नु पर्ने भूमिका र सम्बन्धित निकायले गर्नुपर्ने कामबारे छलफल गरिने कार्यक्रम छ । संघले कार्यक्रमको निष्कर्ष लिपिबद्ध गरी पोखरा महानगरपालिका र गण्डकी प्रदेश सरकारलाई प्रतिवेदन बुझाउने भएको छ । कार्यक्रम महत्वपूर्ण छ । महत्वपूर्ण कार्यक्रममा सहभागी हुन पोखरा आउने सम्पूर्ण सहभागीहरुलाई हामी हार्दिक स्वागत गर्दछौं र कार्यक्रमको पूर्ण सफलताको लागि हार्दिक शुभकामना व्यक्त गर्दछौं ।

Related News

सम्बन्धित समाचार

  • कांग्रेस भित्र प्रधानमन्त्रीको होड

    सम्पादक मंसिर १९, २०७९
    मंसिर ४ गते सम्पन्न चुनावको परिणाम मध्ये प्रत्यक्षतर्फको मतगणना पूरा भएको छ भने समानुपातिकतर्फको गणना पनि सिद्धिने अवस्थामा छ ।…
  • पोखरा बहुमुखी क्याम्पसलाई शुभकामना

    सम्पादक मंसिर १६, २०७९
    पोखरा बहुमुखी क्याम्पस पोखरामा पृथ्वीनारायण क्याम्पसपछिको दोस्रो क्याम्पस हो भने सामुदायिक क्षेत्रमा खोलिएको यो तत्कालीन पश्चिमाञ्चलकै पहिलो क्याम्पस हो ।…
  • सरकारको स्थिरता र अस्थिरताको चर्चा

    सम्पादक मंसिर १४, २०७९
    प्रतिनिधि सभाको निर्वाचनमा कुनै एक पार्टीको बहुमत नआउने भएपछि अब बन्ने सरकार स्थिर होला कि अस्थिर होला भन्ने बहस चल्न…
  • चीनमा विरोध र्‍याली

    सम्पादक मंसिर १३, २०७९
    चीनमा सामान्यतया विरोध भनेको हुँदैन, कहींकतै विरोध भए तापनि त्यसको स्वर सुनिँदैन र त्यस्तो विरोधलाई निर्ममतापूर्वक दबाइन्छ भन्ने भएको बेला…
  • लैंगिक हिंसाविरुद्धको कार्यक्रम

    सम्पादक मंसिर १२, २०७९
    महिलाको संख्या पुरुषको भन्दा बढी छ । बढी भएकोले कतै महिलाको विषयमा उल्लेख गर्नु पर्दा आधा आकाश ढाकेर बसेका महिलाहरु…

hero news full width