नयाँ सरकारका चुनौती

सम्पादक
वैशाख ३०, २०७८

विभिन्न शंका उपशंका र आकलनबीच गण्डकी प्रदेश मुख्यमन्त्रीमा पृथ्वीसुब्बा गुरुङ पुन नियुक्त भएका छन् । प्रतिपक्षी दलहरुको दाबी रहँदा रहँदै प्रदेश प्रमुखले ठूलो दलको नेता भएकै कारण मुख्यमन्त्रीमा नियुक्त गरिन् । यसका विपक्षीहरुको विरोध छँदै छ । मुख्यमन्त्रीको नियुक्तिपछि झन्डै १ महिनादेखि जारी एकखाले अन्योल त चिरिएको छ । गण्डकीको राजनीतिक आकाश त्यति खुल्ने भने देखिएको छैन । तत्कालीन अवस्थामा नेकपाको प्रष्ट बहुमतको सरकार थियो । जनमोर्चाले साथ दिएकै थियो । त्यसमाथि स्वतन्त्र सांसदको समेत समर्थन रहँदा विपक्षी त जम्मा १७ जना थिए । त्यस्तो अवस्थामा केन्द्रको राजनीतिक चलखेलका कारण प्रदेशको राजनीतिक संरचना पनि भत्कियो । चाहना नहुँदा नहुँदै पनि माओवादीका २ मन्त्रीले पद छाडे । हो, ३ वर्षभन्दा बढी शासन चलाएका पृथ्वीसुब्बा पुन मुख्यमन्त्री हुँदा काम सहजरुपमा अगाडि बढ्छ । तर यो सरकारलाई १ महिनाभित्रै विश्वासको मत लिनुपर्ने चुनौती छ । जुन गुरुङ सरकारका लागि त्यति सहज छैन ।

एमाले आफूसँग २७ मत छ । स्वतन्त्र सांसद राजीव गुरुङ (दीपक मनाङे) लाई मन्त्री बनाएपछि उनी पनि उतै लागेका छन् । यसले २८ मत पुग्छ । अहिलेकै संख्या कायम रहँदा पनि बहुमतका लागि ३१ मत नै चाहिन्छ । जुन पु¥याउन कठिन छ । पछिल्ला गतिविधि हेर्दा जनमोर्चाका सांसद कृष्ण थापालाई पार्टीले कारबाही प्रक्रिया अगाडि बढाएको छ । यहीरुपमा प्रक्रिया अगाडि बढेमा उनलाई सांसद पदबाट हटाउन सक्छ उनको पार्टीले । त्यो हुँदा १ मत कम हुन्छ । संसदमा ५९ सदस्य कायम रहन्छन् । त्यति हुँदा पनि एमालेलाई बहुमतका लागि अहिलेभन्दा थप २ मत चाहिन्छ । सरकारविरुद्धको अहिलेकै गठबन्धन कायम रहने हो भने यो सरकारको आयु अबको १ महिनामात्र हो । तर राजनीति हो, केही भन्न सकिने अवस्था छैन । जनता समाजवादी पार्टीले एमालेलाई सहयोग नगर्ला भन्न पनि सकिँदैन । त्यसो भयो भने बल्ल यो सरकार टिक्ला । त्यसो त एमालेमै माधव नेपाल समूहका सांसद इन्द्रलाल सापकोटा पनि छन् । उनको दलको केन्द्रले कस्तो निर्णय गर्छ उनी पनि त्यतै लाग्ने होलान् ।

यो त रह्यो सरकार टिक्ला कि नटिक्ला भन्ने विषय । यहाँ त कोरोनाको महामारी छ । मुख्यमन्त्री र मन्त्रीहरुको समय सत्ता टिकाउने खेलमै बितेको छ । कहाँ कसरी काम भइरहेको छ भन्नेमा अन्योल छ । कोरोना महामारी नियन्त्रणभन्दा बाहिर गइसकेको छ । यस्तो अवस्था यो सरकारले कसरी काम गर्ला । किनभने फेरि १ महिनापछि त संसदमा विश्वासको मत त लिनु नै छ । अर्कोतर्फ प्रदेशको बजेट पनि बितरा पर्ने निश्चित छ । हुन त सरकारी संयन्त्रहरुले विगतका बजेट र योजना आयोगले दिएको सिलिङका आधारमा बजेटका काम गरिरहेका होलान् । जेठ महिनाको अन्तिममा प्रदेशको बजेट आउनुपर्छ । त्यसभन्दा अगाडि नीति तथा कार्यक्रम अनि प्रिबजेट पनि ल्याउनै पर्छ । जसका लागि पर्याप्त समय छैन । भइहाले पनि अवस्था तरल भएका कारण मन्त्रीहरु यसमा व्यस्त हुन पाउने छैनन् । फेरि मुख्यमन्त्री पृथ्वीसुब्बा गुरुङलाई मन्त्री फेर्ने यो उत्तम अवसर पनि हो । कार्यसम्पादनमा पछि परेका मन्त्रीलाई उनले अब अवसर नदिन सक्छन् । मन्त्रीहरु नयाँ आउँदा त्यसै पनि काम प्रभावित हुने नै होला । त्यसैले अबको सरकारलाई काम गर्ने मौकाभन्दा पनि चुनौती धेरै छन् ।

Related News

सम्बन्धित समाचार

    • असारे विकास रोक

      सम्पादक असार १०, २०७८
      चालु आर्थिक वर्षको यो आखिरी महिना हो असार । असार लागेपछि विकास निर्माणले तीव्रता पाउने गरेका छन् । बजेट सक्नकै…
    • थलिएको पर्यटनलाई उकास

      सम्पादक असार ९, २०७८
      अवस्था सहज हुन्थ्यो भने पोहोर नेपालले पर्यटन वर्ष मनाएको हुन्थ्यो । स्वेदशी र विदेशी पर्यटकलाई डाकेर उनीहरुलाई आतिथ्य दिएर मुद्रा…
    • यातायात व्यवसायीको दुख सुनिदेऊ

      सम्पादक असार ८, २०७८
      विश्वव्यापी कोरोना महामारीले असर नपारेको क्षेत्र कुन छ र ? तर कुन क्षेत्रमा कम र बढी असर परेको छ त्यसको…
    • यातायात व्यवसायीको दुख सुनिदेऊ

      सम्पादक असार ८, २०७८
      विश्वव्यापी कोरोना महामारीले असर नपारेको क्षेत्र कुन छ र ? तर कुन क्षेत्रमा कम र बढी असर परेको छ त्यसको…
    • निष्ठावान् व्यक्तित्व यज्ञप्रसाद

      सम्पादक असार ७, २०७८
      पत्रकारिता स्वतन्त्र पेसा हो । यो पेसा अँगाल्ने व्यक्ति पनि स्वतन्त्र रहनुपर्छ भन्ने मान्यता रही आएको छ । पत्रकारले निष्पक्ष…

    hero news full width