१. कोरोनाको महामारीबाट विश्व नै आक्रान्त भएको वेला त्यस रोगको निवारणको औषधी तैयार हुँदैछ भन्ने समाचार मात्रले पनि एउटा आश जगाएको थियो । अहिले त त्यस रोग विरुद्धको खोप परीक्षणको अन्तिम चरणमा पुगेको समाचार आएको छ । विज्ञानको यो चमत्कारले महामारी अव रोकिन्छ भन्ने भरोसाा उत्पन्न भएको छ ।

२. यो खोप तैयार गर्ने काममा विश्वका दर्जानौ औषधी उत्पादक कम्पनीहरु लागि परेका छन् । ती मध्ये चार वटा कम्पनीहरुको खोप अन्तिम चरणमा पुगेको र सम्बन्धित सरकारहरुले इजाजत दिएमा सर्वसाधरणलाई खोप लगाईदिन तैयार भएको वैज्ञानिकहरुले वताएका छन् । सरकारहरुले पनि छिट्टै इजाजत दिन आवश्यक जाँचबुझ गर्दैछन् ।

३. तैयार भएपछि ती खोप नेपालमा के कसरी ल्याउने त्यस सम्बन्धमा सरकारले चासो देखाएको छ । सरकारले त्यसरी खोप आयात गर्न कुनै नियम कानून वाधक नहोस् भनेर अध्यादेश जारी गरिउको छ । राष्ट्रपति विद्यादेवी भण्डारीबाट जारी अध्यादेशले खोप आयात गर्ने बाटो प्रशस्त गरेको छ ।

४. अहिलेसम्म विश्वका चार वटा कमपनीको काम अन्तिम चरणमा पुगेको छ । अन्य कम्पनीहरुले पनि सकेसम्म छिटो आफ्नो खोप बजारमा ल्याउन रातादिन प्रयास गरिरहेका छन् । अन्तिम चरणमा पुगेकामध्ये अमेरिकाको फाइजर बायोटेक र मोडर्ना, बेलायतको अक्सफोर्ड, अष्ट्रेलियाका र रुसको ग्यामेलिया इन्ष्टिच्यूट रहेका छन् ।

५ सरकारले ती मध्ये कुन कम्पनीको उत्पादन हाम्रो लागि उपयुक्त हुन्छ, त्यसको अध्ययन गर्दैछ । त्यसरी आयात गर्न छिटो छरितो होस भनेर सरकारले अर्थ, स्वास्थ्य र परराष्ट्र मन्त्रालयका सचिवहरुको एक समिति पनि गठन गरेको छ । त्यसले आफ्नो काम प्रारम्भ गर्दैछ ।

६. यसैबीच एक दुई जनाल खोप चीनबाट ल्याउनु पर्दछ पनि भन्दैछन् । यस्तो महामारीको वेला हामीले कुनै देशप्रति लालयित हुनु र झुकाव राख्नु हुदैन । जहाँबाट ल्याउँदा उपयुक्त हुन्छ त्यहीबाट ल्याउनु पर्दछ । विगतमा झै अहिले पनि विचौलियाहरु सक्रिय हुन सक्दछन् । त्यसमा सरकार सतर्क हुनुपर्दछ ।

७. विचौलियाहरुबाट सरकार बदनाम भएको अवस्था छ । कोरोनाकै बन्दोबस्तीका सामान ल्याउँदा पनि सरकार विवादमा फसेको थियो । अव त्यस्तै अवस्था आउन दिनु हुँदैन । कोरोनाबाट सबै पीडित भएको वेला जहाँबाट खोप छिटो ल्याउन सकिन्छ सस्तो हुन्छ र जलवायु अनुसार उपयुक्त हुन्छ त्यहीबाट ल्याउनु पर्दछ । यो काममा ढिलो गर्नु हुँदैन, अलमलिनु हुँदैन र पूर्वाग्रह राखिनु हुदैन ।