१. रक्त सञ्चार केन्द्र पोखरामा यतिखेर रगतको अभाव भएको छ । रक्त अभावका कारण विरामीहरुको उपचारमा समेत समस्या हुने गर्दछ । कतिपय रगतकै अभावमा विरामी भएका हुन्छन् । कति दुर्घटनामा परेकाहरुलाई रगत दिनुपर्ने हुन्छ । शल्यक्रिया गर्नुपर्ने विरामीहरुलाई पनि रगतको आवश्यकता हुन्छ ।

२. रगतको विकल्प अरु छैन । मानिसलाई मानिसकै रगत चाहिन्छ । रगतकै अभावमा पनि धेरै मानिसहरुको मृत्यु हुने गरेको छ । तसर्थ रक्त अभावको वेला रगत दिनु जीवन दिनु सरह हो । यसैले रक्तदानः जीवनदान भन्ने गरिएको हो । रगतको अभाव अरु कुराले पुरा नहुने हुँदा यसलाई महादान पनि भनिन्छ ।

३. रगतको अभावमा कसैले जीवन गुमाउन नपरोस् भनेर ब्लड बैंकहरु खोलिएका छन् । ती बैंकहरुमा रगतलाई सुरक्षित रुपमा राखिन्छ र आवश्यक परेका अवस्थामा माग भई आए पछि दिने गरिन्छ । रगत सुरक्षण गरे वापतको सामान्य शुल्क तिर्नु पर्दछ । असाहाय विरामीहरुका लागि त्यो पनि छुट हुन्छ । रगत विक्री गर्न कानूनी रुपमै बन्देज लगाईएको छ ।

४. स्वस्थ्य मानिसले प्रत्येक तीन महिनामा रक्तदान गर्न सक्छन् । मानिसको शरीरमा रगत आफै फेरिरहने हुँदा रक्तदान गरेर स्वास्थ्यमा नोक्सान हुदैन । फेरिने रगत भनेको आफै नष्ट भएर जाने हो । त्यसरी नष्ट भएर जाने रगतलाई दान गर्दा कसैको जीवन पाउँछ भने त्यो ठूलो उपलब्धी हो । फेरी खेर जाने भन्दैमा कसैले गरेको रक्तदानलाई सामान्य मान्नु हुदैन । किनकी त्यही रक्तदानबाट नै धेरैको उद्धार हुने गरेको छ ।

५. पहिले पहिले रक्तदान गर्ने भने पछि मानिसहरु तर्सन्थे । आफू कमजोर भइन्छ भन्ने धेरैलाई भ्रम थियो । रक्तदान गरेर कमजोर हुने होइन, अझ स्वास्थ्य राम्रो हुन्छ भन्ने भएपछि हच्किन छाडे । अहिले रक्तदानको लागि मानिसहरुलाई कर गर्नुपर्ने अवस्था छैन । सूचना पाउने वित्तिकै स्वत स्फूर्त रुपमा रक्तदान हुने गरेको छ । विभिन्न संघ संस्थाहरुले पनि रक्तदान कार्यक्रम राखेर सघाई रहेका छन् । यो खुशीको कुरा हो ।