१. देशमा मनसुन भित्रिएसँगै बाढी पहिरो आदि प्राकृतिक प्रकोपको बृद्धि भएको छ । केही अघि पर्वतको दुर्लुङमा पहिरो जाँदा दुई घर पुरिए, नौ जना वेपत्ता भए । पछिल्लो समय बझाङको केदारस्यूँ गाउँपालिका–८ मल्लेसीमा पहिरो जाँदा १७ घर पुरिए । वेपत्ता ७ मध्ये ४ जनाको शव फेला परेको छ । यसैगरी विभिन्न स्थानमा नदी कटानले क्षति पुर्‍याएको छ ।

२. पहाडी मुलुक भएकोले हरेक वर्ष वर्षमा कहि न कहि बाढि पहिरोबाट क्षति त भै रहेकै छ । तर यस वर्ष बढी वर्षा हुने अनुमान भएका कारण प्राकृतिक प्रकोपबाट पुग्न सक्ने क्षतिबारे समयमै ख्याल गरी बचाउँको लागि सतर्कता अपनाउनु जरुरी छ । यस वर्ष बंगालको खाडीमा भएको चक्रवातको कारण जेठमै ठूलो वर्षा भएको हुँदा जमिन गलिरहेको छ ।

३. बढी भिरालो जमिन तथा नदी किनारमा रहेका बस्तीहरुमा बढी होसियारी अपनाउनु पर्दछ । यसैगरी नदीले कटान गर्ने सक्ने स्थान र डुबान हुन सक्ने स्थानका बासिन्दाले सचेत हुन जरुरी छ । बढी जोखिम रहेका स्थानहरुको पहिचान गरी सरकारले त्यस क्षेत्रका बासिन्दालाई जानकारी गराईराख्ने तथा विपद् व्यवस्थापनका लागि आवश्यक तयारी पनि गर्नु आवश्यक छ ।

४. प्राकृतिक प्रकोपबाट ठूलो जनधनको क्षति हुन नदिन तथा क्षति न्यूनीकरणमा सरकारले कदम चालिहाल्नु पर्छ । जल तथा मौसम विज्ञान विभागले वर्षा वा बाढीको पूर्व अनुमान तथा पूर्व सूचना छिटो दिने, जोखिम स्थितिमा समय समयमा जानकारी गराईराख्ने आदि गराई राख्नु जरुरी छ । यसैगरी सरकारले उद्धार कार्यका लागि पनि आवश्यक श्रोत साधन र जनशक्ति तयारी गर्नु पर्दछ ।

५. विपद्का वेला उद्धार कार्यमा नेपाल रेडक्रसले विशेष भूमिका खेल्दै आएको छ । त्यस बाहेक पनि विभिन्न संघ, संस्था, युवा क्लब आदिलाई विशेष प्रशिक्षण प्रदान गरी परिचालन गर्न सकिन्छ । साथै आमजनतालाई पनि बाढी पहिरोको वेला ध्यान दिनु पर्ने कुराबारे जानकारी दिई जनधनको सुरक्षाको लागि सचेत गराउन आवश्यक छ ।