सरकारले सातौं संविधान दिवसको उपलक्ष्यमा राज्यका विभिन्न क्षेत्रमा काम गरेका ९०३ जनालाई तक्मा विभूषण प्रदान गर्ने घोषणा गरेपछि त्यो विवादको भूमरीमा फसेको छ । हुन त यसअघि पनि सरकारले प्रदान गर्ने विभूषण आदि विवादको विषय नबनेको होइन तर यस पटक त्यो विवादले सीमा नाघेको छ । विगतमा भन्दा यसपटक सर्वाधिक ९०३ जनाको नाम तक्मा विभूषण पाउने फेहरिस्तमा सूचीकृत गरिएको छ । एकातिर यो संख्या अपेक्षा गरिएभन्दा अत्यधिक बढी भयो भने अर्कोतिर ती नामहरु राजनीतिक भागबन्डाको आधारमा तयार गरिएकाले विवादमा तानिएको हो ।
राम्रो काम गर्नेलाई अनेक विभूषणबाट विभूषित गर्ने काम राजतन्त्रकै बेलादेखि चलिआएको चलन हो । त्यसबेलामा पनि ठूलठूला विभूषण आदि दरबारभित्रका र दरबारियाहरुकै आफन्तलाई दिने गरियो भनी असन्तुष्टि व्यक्त हुने गर्दथ्यो । गणतन्त्र आएपछि यसलाई विवादरहित गराउने भनेर विभूषणको नाम परिर्वन गरियो । २०६५ सालमा विभूषणसम्बन्धी पुरानो प्रावधान खारेज गरी नयाँ व्यवस्थाको सुरुआत गरियो । २०७७ सालमा त्यस्तो मानपदवी अलंकार र विभूषण १०० जनालाई मात्र दिने भनियो तर नेताहरु त्यो सीमामा सीमित रहन सकेनन् । त्यो सीमालाई बढाएर २०० जना पु¥याए । त्यसबाट पनि नभएर तजबिजी अधिकार ल्याइयो, जति धेरैलाई दिने गरियो उति यो विवादित पनि बनियो भने यसको मूल्य र महत्वमा पनि ह्रास आएको बताउने गरिएको छ । विभूषण पाउने सूचीमा परेका कतिपयले विभूषण ग्रहण नगर्ने घोषणा गरेका पनि छन् ।
सरकारले यसपटक सबैभन्दा माथिल्लो विभूषण नेपाल रत्नबाट पूर्वप्रधानमन्त्री कृष्णप्रसाद भट्टराई (मरणोपरान्त) लाई दिने घोषणा गरेको छ । धेरै विभूषण नेताहरुलाई र नेताहरुको आफन्तलाई प्रदान गरिने भएको छ । केही कानुन व्यवसायीहरुले पनि यसपटक विभूषण पाउने भएका छन् । कोभिड–१९ को क्षेत्रमा साहसका साथ रातोदिन सेवा गरेका चिकित्सकहरु, स्वास्थ्यकर्मीहरु, सुरक्षाकर्मीलाई पनि विभूषणका लागि छानिएका छन् । यस क्षेत्रका धेरै अभियन्ताहरु छानिने अनुमान गरिएको छ ।
तक्मा, पुरस्कार र सम्मान पाउन ठूलो कुरा हो । आपूmले निस्वार्थ भावले गरेको कामको मूल्यांकन गरी कसैले त्यसको प्रतिफलस्वरुप पुरस्कार दिनु अरु काम गर्न प्रेरित गर्नु हो । यो एउटा राम्रो परम्परा पनि हो । सामाजिक जीवनमा धेरै पहिलेदेखि यस्तो चलन चल्दै आएको थियो । राज्यले पनि त्यसकै सिको गरेर तक्मा विभूषणको व्यवस्था गरेको छ । यसलाई निसन्देश राम्रो मान्नु पर्दछ तर छनोट गर्नेहरुले निष्पक्षता कायम गर्नु पर्दछ । आफ्नो र अर्काको भनी भेद गर्नु हुँदैन । मूल्यांकन निष्पक्ष हुनुपर्दछ । निष्पक्ष मूल्यांकन गरियो भने इमानदारीपूर्वक काम गर्नेहरु प्रोत्साहन हुन सक्छ र अरु काम गर्न प्रेरित हुन सक्छन् । समावेश गरिएकाहरुलाई आगामी वैशाख १ गते राष्ट्रपतिबाट विभूषण प्रदान गर्ने परम्परा छ । हामी विभूषणयोग्य सबैलाई बधाई ज्ञापन गर्दै शुभकामना ज्ञापन गर्न चाहन्छौं ।