१. गण्डकी प्रदेश सभाको छैटौं तथा यो वर्षको बर्खे अधिवेशन सोमबार देखि सकिएको छ । जेठ ११बाट सुरु भएको अधिवेशनले आव २०७६ को बजेट पारित साथै १४ वटा विधेयक पारित गरेको छ । गण्डकी प्रदेशसभाको पहिलो बैठक २०७४ माघ २२ गते बसेको थियो । त्यस यता कुल ४६ वटा विधेयक पारित भएका छन्

२. विधायन समितिमा दुई वर्ष भन्दा बढी रोकिएर बसेका प्रदेशसभा सचिवालय विधेयक अहिले पारित भयो । यसैगरी प्रदेश विकास समिति, विकास प्रधिकराण, गण्डकी प्रज्ञा प्रतिष्ठान, प्रदेश कृषि व्यवसाय पारित भएको छ । विज्ञान तथा प्रविधि प्रतिष्ठान, प्राविधिक शिक्षा तथा व्यवसायिक तालिम प्रतिष्ठान स्थापना गर्ने बाटो पनि खुलेको छ ।

३. समयमै प्रदेशको नामाकरण र राजधानी तोक्ने कार्य टुंग्याउन सफल रहेको गण्डकी प्रदेशलाई अनावश्यक विवादमा अल्झेर बस्नु परेको अवस्था छैन । प्रदेश सभामा नेकपाको बहुमत रहेपनि अधिकांश निर्णयहरुमा प्रतिपक्षी पार्टीको रचनात्मक सहयोग रहँदै आएको छ । यसपटक कांग्रेसले निर्वाचन क्षेत्र पूर्वाधार कार्यक्रम र कोरोना नियन्त्रणको विषयलाई लिएर सदन अवरुद्ध गरेको थियो भने प्रदेश सभामा पहिलो पटक संकल्प प्रस्ताव पनि दर्ता भएको थियो ।

४. प्रदेशको शान्ति, सुरक्षा लगायत विदेशी लगानी भित्र्याउने आवश्यक विधेयकहरु पारित हुँदा प्रदेश सरकारलाई काम गर्न भईसकेको छ । यसका लागि आवश्यक नियमावली बनाउन स्वीकृत भएको छ । यही शैक्षिक सत्रबाट पढाई सुरु गर्ने तयारी छ । यसैगरी महालेखाले देखाएको वेरुजु फस्र्यौट गर्ने कार्य पनि धमाधम भईरहेको जानकारी दिईएको छ ।

५. कामकाजमा संघीय सरकारभन्दा गण्डकी प्रदेश अगाडि रहेको मुख्यमन्त्री पृथ्वीसुब्बा गुरुङको दावी छ । संघीय लगायत अरु प्रदेश सरकारहरु विभिन्न विवादमा फसिरहेका छन् वेला गण्डकी प्रदेश त्यो अवस्थाबाट मुक्त रहनु राम्रो हो । दुःखद् कुरा यो वर्ष गण्डकी प्रदेशले सबै भन्दा ठूलो प्राकृतिक प्रकोप भोग्न पर्‍यो । अविरल वर्षाका कारण बाढीपहिरोबाट ठूलो धनजनको क्षति भयो । वाढी, पहिरो पीडितहरुलाई आवश्यक राहत पुर्‍याउने र व्यवस्थित गर्ने काम अझै बाँकी छ । प्रदेश सरकारले छिटो पूरा गरोस् । वेलैमा जिम्मेवारी पुरा गरेर यसमा पनि नमूना देखाओस् ।