आज हामी वरिष्ठ पत्रकार एवं हाम्रो आदर्श समाज राष्ट्रिय दैनिकका तत्कालीन सम्पादक यज्ञप्रसाद बास्तोलाको प्रथम वार्षिक पुण्यतिथिको अवसरमा भावविभोर भएर उनीप्रति हार्दिक श्रद्धाञ्जली अर्पण गर्न प्रस्तुत भएका छौं । उनले सम्पादकको नाताले भएको स्तर वृद्धि गरी यसको प्रचार–प्रसारमा महत्वपूर्ण योगदान गरेका थिए । उनले एक सहकर्मीका रुपमा हामीमाथि अभिभावकत्व प्रदान गरी सल्लाह सुझाव दिने गरेका थिए । जुन कुरा हामीलाई अविस्मरणीय रहेको छ । उनले पोखराबाट प्रकाशित माइक्रोन्युज दैनिकमा पनि सम्पादक भएर काम थिए । उनले पत्र–पत्रिकामा समसामयिक लेख रचनाहरु लेख्ने गर्दथे । उनले लामो समय माछापुच्छ्रे एफएम र हिमचुली एफएममा लामो समय धार्मिक कार्यक्रम सञ्चालन गरेका थिए ।

उनले अरुले लेखेका किताबहरुको पनि सम्पादन गर्ने र भूमिका लेख्ने गर्दथे । किताबको समीक्षा गर्ने काममा पनि धेरैले उनलाई आग्रह गर्दथे । उनले सटिक किसिमले भूमिका लेख्ने र समीक्षा गर्ने गर्दथे । जसलाई सबैले मन पराउँथे । यस क्षेत्रमा उनी चर्चित र प्रशंसित थिए । उनी अध्ययनशील स्वभावका बौद्धिक व्यक्तित्व थिए । सबै विषयक ज्ञाता थिए । उनी तर्क र प्रमाण पेस गरी कुरा गर्दथे । मानिसअनुसारको कुरा गर्नमा पनि उनी निपूण थिए । उनी जुन स्तरका मानिस आउँछन्, सोहीस्तरका कुरा गर्दथे । जसले गर्दा उनी के–कति जानकार थिए, सिपालु थिए भन्ने कुरा जसले पायो उसले भेउ पाउन सक्दैनथ्यो । त्यस्तो बौद्धिक व्यक्तित्व भएर पनि उनले कहिल्यै ज्ञानको घमण्ड गरेनन् । सादा जीवन उच्च विचारको सिद्धान्तमा उनले जीवनयापन गरेका थिए ।

उनले सबै धर्मको अध्ययन गरे । ती धर्मभित्रको रहस्य पत्ता लगाउन पनि खोजे । त्यस क्रममा उनी आनन्द मार्गमा पुगे । आनन्द मार्गको अध्ययन गरेपछि उनी त्यसैमा आउँछ । अर्थात् आनन्द मार्गलाई अपनाए । उनी यज्ञ प्रभारजी भए । उनी आनन्द मार्ग प्रचार संघमा आबद्ध भए । त्यस मार्गको पोखरा शाखाका अध्यक्ष भए, केन्द्रीय सदस्य पनि भए । उनी नेपालमा त्यस संस्थाको एक खम्बा भएर रहे । उनी सात्विक भोजन ग्रहण गर्दथे र बिहान सबेरै ध्यान साधना गर्दथे । सुरुमा उनी शिक्षण पेसामा थिए । उनले नवलपरासीको विभिन्न विद्यालयमा पढाए । प्रधानाध्यापक पनि बने । शिक्षकको हकहितको लागि भएको आन्दोलनमा लागे । २००८ सालमा पोखरा १९ मा जन्मेका उनी सानैदेखि नम्र, मिजासिला थिए । सबैसँग मैत्रीभाव राख्ने र सहयोगी भावनाका थिए । सामाजिक अभियन्ताका रुपमा पनि काम गरे । धेरै अनुभव हासिल गरे । जुन क्षेत्रमा उनले काम गरे, त्यहाँ केही न केही काम गरे योगदान दिए । यस्तो व्यक्तिको २०७८ साल जेठ २६ गते कोरोना महामारीको कारण देहावसान भयो । यो हामी सबैका लागि अपूरणीय क्षति हो । हामी उनको निधनमा गहिरो दुख व्यक्त गरी श्रद्धाञ्जली अर्पण गर्दछौं र शोकसन्तप्त परिवारजनप्रति हार्दिक समवेदना व्यक्त गर्दछौं ।