१. राष्ट्रपति विद्यादेवी भण्डारी चीनको राजकीय भ्रमणका लागि आज त्यसतर्फ प्रस्थान गर्दैछन्। उनी चीनका समकक्षी सी जिन पिङको निमन्त्रणामा त्यसतर्फ जान लागेकी हुन्। उनी वैशाख १९ गतेसम्म त्यहाँ रहने छिन्। राष्ट्रपति भण्डारीले वैशाख १२ र १३ गते हुने बेल्ट एण्ड रोड इनिसिएटिभको अन्तराष्ट्रिय सम्मेलनलाई सम्बोधन गर्ने पनि कार्यक्रम छ।

२. चीनले बेल्ट एण्ड रोड इनिसिएटिभको यो दोस्रो अन्तराष्ट्रिय सम्मेलन भव्यताका साथ आयोजना गर्दैछ। त्यसले “बेल्ट एण्ड रोड सहकार्य, एक उज्वल साझा भविष्य” भन्ने मूलनारा दिएर आयोजना गरेको सम्मेलनमा १ सय ३६ मुलुक र २९ अन्तराष्ट्रिय संस्थाहरु सहभागी हुँदैछन् भने त्यसमा ३७ मुलुकका राष्ट्राध्यक्ष एवं सरकार प्रमुख हुने जनाइएको छ।

३. चीनको यो महत्वाकांक्षी योजनामा नेपालले हस्ताक्षर गरिसकेको छ। हस्ताक्षर गरेर नेपालले जे जसरी परियोजनाहरु प्रस्तुत गर्नुपर्ने हो, त्यो भने गरिसकेको छैन। यसैबीच त्यस आयोजनाको नकारात्मक कुरा पनि बाहिर आएको छ। त्यसले गर्दा पनि सरकार बढी सजग र सतर्क हुनु पर्ने भएको छ।

४. चीनको एक कम्पनीले पोखरा क्षेत्रीय अन्तराष्ट्रिय विमानस्थलको काम जे जसरी गरिरहेको छ, त्यसले राम्रो प्रभाव पारेको छ, उता सरकारले नेपालले नै बनाउने भनी निर्णय गरेको बूढी गण्डकी जलविद्युत परियोजना चीनलाई दिन खोजेकोमा भने नेपाली जनता रुष्टछन्। त्यसमा सरकारले अझै गम्भीर किसिमले सोच्नु आवश्यक छ।

५. राष्ट्रपति भण्डारीको राजकीय भ्रमणको अवसरमा रेल मार्ग पारवहन तथा परिवहनको प्रोटोकलमा अन्तिम रुप दिने, चीनको बन्दरगाहमा नेपालको पहुँच, नाका खोल्न र नाकालाई व्यवस्थित गर्ने सम्बन्धमा हस्ताक्षर हुनेछ। यस अवसरमा चीन सरकारले नेपालको कुनै एक परियोजना सहयोगको घोषणा हुने अपेक्षा पनि गरेको छ।

६. राष्ट्रपति भण्डारीले आफ्ना समकक्षी सीसँग उच्चस्तरीय वार्ता गर्ने कार्यक्रम छ। उनी चीनमा आयोजित अन्तराष्ट्रिय वागवानी सम्मेलनमा पनि सहभागी हुनेछन्। उनले सम्मेलनमा राखिएका नेपाली स्टलको अवलोकन पनि गनेर्छिन्। नेपाली स्टल लुम्बिनीको प्रकृति झल्काउने किसिमले निर्माण गरिएको छ।

७. राष्ट्रपति भण्डारीले आफ्नो चीन वसाइमा नेपाल र चीनका व्यापारीहरुलाई सम्बोधन गर्ने कार्यक्रम पनि निर्धारण गरिएको छ। उनले सान्सी प्रान्तको राजधानी सियानको भ्रमण पूरा गरी ल्हासा हुँदै १९ गते नेपाल फर्कने छन्। राष्ट्रपतिको भ्रमण दलमा परराष्ट्रमन्त्री प्रदीप ज्ञवाली, प्रदेश ३ का मुख्यमन्त्री डोरमणि पौडेल, परराष्ट्र सचिव लगायत २५ जना उच्च अधिकारीहरु छन्। राष्ट्रपतिले ११ गतेदेखि १९ गते सम्मको लामो अवधि एउटै देशको भ्रमणमा बिताउने भएकोले यो भ्रमणको अत्यधिक महत्व भएको अनुमान गरिएको छ।