१. सरकारले सन् २०२० लाई नेपालभ्रमणवर्ष घोषणा गरेको छ । सरकारको घोषणा अनुसार भ्रमणवर्ष आउन अहिले मात्र दुई साता बाँकी छ । भ्रमणवर्षसँग सम्बन्धित पदाधिकारी तथा सदस्यहरुलाई अहिले त्यसको उद्घाटन समारोहको तयारी गर्दै भ्याइनभ्याई भएको छ ।

२. सरकारले भ्रमणवर्षमा २० लाखपर्यटकहरु भित्यारउने लक्ष्य राखेको छ । सरकारले भ्रमणवर्ष सम्पन्न भएपछि त्यो कार्यलाई निरन्तरता दिन नेपाल भ्रमण दशक मनाउने तैयारी गरेको छ । सरकारको त्यो तैयारीले धेरैलाई आशा जगाएको छ ।

३. नेपाल विश्वको नै सुन्दरतम देश हो । यहाँका हिमालहरु, डाँडाकाँडा पाखापखेराहरु, नदीनालाहरु र तिनीहरुले बनाएका उपत्यका र वस्तीहरु विश्वमा नै रमणीय मानिन्छन् । तर यहाँका हेर्न लायकका कुराहरु प्राकृतिक छटा मात्र होइनन्, धार्मिक सम्पदा र सांस्कृतिक विविधताले पनि यो देश सम्पन्न छ ।

४. धार्मिक सम्पदाहरुको उल्लेख त्यति प्रचुर मात्रामा भएका छैनन् । लुम्बिनी र जनकपुरको कहिलेकाहीं चर्चा गर्ने गरिन्छ । त्यो पनि आवश्यक मात्रामा गरिएको पाइँदैन । धर्म भन्नासाथ नाक खुम्च्याउने प्रवृत्तिले पनि यस क्षेत्रमा अथाह किसिमले अवरोध तेस्र्याएको छ । लुम्बिनी दर्शन, अवलोकनका लागि जानेहरुलाई तीर्थयात्री नभनी पर्यटक मात्र भन्न थालिएको छ ।

५. लुम्बिनीप्रति विश्वको ध्यान आकर्षित गर्न लुम्बिनीलाई धार्मिक, ऐतिहासिक, पुरातात्विक सम्पदा भनी वर्णन गर्दा जति आकर्षित हुन्छन्, त्यत्ति पर्यटकीय गन्तव्य भन्दा नहुन सक्छ । जानेर या नजानेर गरिएको यस्तो गल्तीलाई रोक्नु पर्दछ ।

६. तयारीको क्रममा वर्णन गर्ने गरिएको भैरहवाको गौतमबुद्ध विमानस्थल अझै नसिद्धिने भयो । भ्रमणवर्ष सन् २०२० लाई सघाउ पुग्ने गरी प्रदेश सरकारहरुले आ–आफ्नो क्षेत्रमा सन् २०१९ लाई जे जसरी आन्तरिक भ्रमणवर्ष घोषणा गरिएको थियो, त्यसले पनि लक्ष्य हासिल गर्न नसकेको अनुमान गरिएको छ ।

७. अझै समय छ । भ्रमणवर्ष शुरु हुन लागेको मात्र छ । अब हाम्रा विदेशस्थित राजदूतावास गैर नेपाली संघहरु, नियोगहरुलाई सक्रिय पारेर प्रचार प्रसारमा लगाउन सके २० लाख पर्यटक भिœयाउने ठूलो कुरा होइन । हाम्रो प्रयासलाई तीव्र पार्नुपर्दछ, व्यापक पार्नु पर्दछ । किनभने यो अवसरलाई सफल पार्न व्यापकताको खाँचो छ ।