१. देशमा अहिले कोरोना भाइरसको महामारी फैलिरहेको वेला मौसमी वदलीले पनि चिन्तित बनाइरहेको छ । दिनहुँ असिना पानीले बालीनालीमा क्षति पुर्‍याइरहको छ । बादल गर्जनबाट पर्ने चट्याङले जनजीवनलाई त्रास बनाएको छ । खोला किनारका वस्तीहरुमा बाढी पसी डुवान भएको छ । वर्ष नलाग्दै यस्तो प्रकोप बेहोर्नु पर्‍यो।

२. बंगालको खाडीमा आएको शक्तिशाली चक्रवात अम्पुनको प्रभाव नेपालमा परेको मौसमविदहरु बताउँछन् । आँधिका कारण बंगालमा ठूलो धनजनको क्षति भएको छ । अहिले त्यो आँधि मत्थर भएको छ । तापनि त्यसले नेपालमा हुने मनसुनी वार्षालाई पनि प्रभावित बनाउँदछ । नआउनु पर्ने वेला वर्षा हुने र चाहिने वेला वर्षा नहुँदा समयमा गर्नुपर्ने खेतीमा नोक्सानी पुग्ने हुन्छ ।

३. यसैगरी भारतमा यतिखेर विनासकारी कीरा सलहले आतङ्क मच्चाएको छ । राजस्थान, गुजरात, उत्तरप्रदेशसहित महाराष्ट्रमा सलहको प्रकोप देखिएको छ । सलहका कारण सो क्षेत्रका किसानहरु आक्रान्त बनिरहेको र सलह नियन्त्रणका लागि विषादी छर्क दमकल समेत प्रयोग गरिएको समाचारपत्रहरुले उल्लेख गरेका छन् ।

४. सलह एक प्रकारको पट्याङ्ग्रा जस्तो कीरा हो । यो ठूलो समूह आई एकै छिनमामै धेरै खेतीवाली नष्ट गर्दछ । अमेरिकी फौजी कीरा भन्दा कयौं गुणा बढी क्षति गर्न सक्ने यो कीराको समूह यति वेला भारत सहित पाकिस्तान र इरानमा पनि प्रवेश गरेको छ । संयुक्त राष्ट्रसंघको कृषि तथा खाद्य संगठनले यसलाई सलह प्लेगको पनि संज्ञा दिएको छ । यसले कोरोना भाइरसले भन्दा पनि बढी क्षति पुर्‍याउन सक्ने बताइएको छ ।

५. एकदिनमा १३० किलोमिटर सम्म हुल बनाएर हिड्ने यो कीरा नेपालमा पस्यो भने पूर्वीभागबाट तीन चार दिनमै पश्चिमी भागमा पुग्न सक्दछ । भारतमा आइसकेको सलह नेपालमा पनि नआउला भन्न सकिदैन । त्यसको रोकथामको लागि सरकारले वेलैमा ध्यान पुर्‍याउनु जरुरी छ । सलहबाट प्रकोप भएका देशको अनुवभ छ र ती देशले के विधि अपनाईरहेका छन् विज्ञहरुबाट जानकारी लिएर छिट्टै रोकथामको उपाय गर्नुको अर्काे विकल्प छैन ।