मुग्लिन पोखरा सडक विस्तारको काम सुरु भएको २ वर्ष भइसकेको छ । तर काम भने निकै धिमा गतिमा भइरहेको छ । जसका कारण स्थानीय बासिन्दाका साथै सडकबाट वारपार गर्नेहरू निकै मारमा परेका छन् । स्थानीयलाई धुलो र हिलोको सास्ती, यात्रीलाई भनेको समयमा गन्तव्यमा पुग्न नपाएर झन्झट । बाटो चाक्लो होला, यातायात आवागमनमा सहज होला भनेर बसेका सर्वसाधारणलाई ठेकेदार कम्पनीको कार्यशैलीले दिक्क बनाएको छ । यसबाट नेपालको प्रशासनिक र राजनीतिक नेतृत्वमाथि पनि प्रश्नचिह्न खडा भएको छ । अनुगमन र मूल्यांकन गर्ने जिम्मा त नेपाल सरकार र मातहतका कार्यालयलाई छ । भत्काउने बेलामा सबैतिर भत्काउने, अस्तव्यस्त बनाउने अनि निर्माणको काम निकै धिमा गतिमा गर्ने गरिएको छ । कहिले स्थानीयको अवरोध, कहिले निर्माण सामग्रीको अभाव त कहिले विद्युत प्राधिकरणको असहयोगलाई कारण बनाइएको छ । यी सबै अब वहाना जस्ता लाग्न थालेका छन् ।

यो आयोजनालाई मुख्यगरी २ भागमा बाँडिएको छ । मुख्यखण्ड भनेको मुग्लिनदेखि जामुने एउटा र जामुने पोखरा अर्को खण्ड हो । मुग्लिन जामुने खण्डको काम अलि देखिँदा पश्चिम खण्डको कामको प्रगति त्यति पनि हुन सकेको छैन । पश्चिम खण्डअन्तर्गत जामुनदेखि पोखरासम्मको सडक निर्माणका चीनको यनहुइ काइयुयान हाइवे एन्ड ब्रिज कन्स्ट्रसन २०७८ जेठ २ गते ७ अर्ब ४० करोड ४६ लाख रुपैयाँमा निर्माण सम्झौता गरिएको थियो । एसियाली विकास बैंकको सहुलियत ऋण सहयोगमा बन्न लागेको उक्त सडकको प्रगति भने ८ प्रतिशतमा सीमित रहेको छ । सडकको पूर्वी खण्डको प्रगति भने २० प्रतिशत छ । मुग्लिन–जामुनेसम्मको ४१ किलोमिटर सडकका लागि चाइना कम्युनिकेसन कन्स्ट्रक्सनसँग २०७७ माघ १७ गते ६ अर्ब २१ करोड ३१ लाख १३ हजार रुपैयाँमा ठेक्का सम्झौता भएको हो ।

विकासको नमुना हेर्न चीन जानू भन्ने कहावत नै बनेको छ । तर त्यही देश चीनका कम्पनीले ठेक्का पाएको आयोजनाको काम किन समयमा हुन सकेको छैन त? यो निकै सोचनीय विषय हो । चिनीया कम्पनीले ठेक्का पाएको नारायणगढ मुग्लिन सडक खण्डको अवस्था पनि उस्तै छ । बनाएर बुझाइसक्नुपर्ने बेला भयो तर काम जस्ताको तस्तै बाँकी नै छ । बर्खाको बेला छ, कहिलकाहीं त पोखरेलीहरू नाकाबन्दीमा परेजस्तो हुन्छन् । अर्बौं खर्चेर बनाइएको एअरपोर्टमा भनेको समयमा उडान हुँदैन, बाटोको अवस्था दयनीय छ । निर्माणाधीन अवस्थामा रहेकाले कतिबेला कहाँ पहिरो जाने हो ठेगान छैन । पृथ्वी राजमार्ग त अस्तव्यस्त नै भयो । उता सिद्धार्थ राजमार्गको अवस्था पनि कहाँ गतिलो छ र ? दशकौं अघि बनाइएको रामदीको पुल जीर्ण भइसकेको छ । ठूला मालवाहक ट्रकहरू त्यो पुलबाट आउन जान पाउँदैनन् । जसका कारण बुटवलबाट पाल्पा हुँदै स्याङ्जातिर सामान ल्याउन अहिले निक अप्ठेरो छ । वैकल्पिक भनिएका सडकको अवस्था पनि बेहाल छ । निर्माणको कामलाई गति दिनुबाहे यो समस्याको विकल्प अरु छैन ।