मेलम्चीको कथा

Avatar सम्पादक
माघ २८, २०७५

१. काठमाण्डौं उपत्यकालाई खाने पानी उपलब्ध गराउने भनिएको मेलम्ची खाने पानी योजनामा फेरि व्यवधान उत्पन्न भएको छ। यो व्यवधानले काठमाण्डौंमा खाने पानी पूर्ति गनेर्काम पूरा गर्न अरु दुई तीन वर्ष लाग्ने देखिन्छ। मेलम्ची खाने पानी योजनामा धेरै पटक धेरै बाधा अवरोधहरू उत्पन्न भएका थिए। ती बाधा अवरोधका कारणले मेलम्ची खाने पानी आयोजनालाई वर्षौ पर हुत्याएको छ।

२. नेपालको विकास निर्माणको जुन कथा छ, त्यही कथा मेलम्चीको पनि छ। त्यस हिसावले भन्ने हो भने   मेलम्ची खाने पानी आयोजना नेपालको विकास निर्माणको एक प्रतिनिधि आयोजना भन्नु अतिशयोक्ति हुदैन। त्यस आयोजनाले धेरै कथा, व्यथा बोकेको छ र धेरै आशा निराशा ल्याएको छ।

३. दुई तीन वर्षदेखि त्यस आयोजनामा काम गर्ने पदाधिकारीहरूले कहिले नयाँ वर्ष वैशाख १ गतेदेखि मेलम्चीको पानी काठमाण्डौंमा वितरण गरिने भन्दछन् भने वैशाख १ गते पार भएपछि आगामी विजया दशमीका दिनदेखि पानी वितरणको तयारी भइरहेको बताएर राजधानीका उपभोक्ताहरूलाई आशा जगाउने काम गर्दै आएका छन्।

४. यस पटक आयोजनाको ९७ प्रतिशत काम पूरा भएको र अव मात्र ३ प्रतिशत काम बाँकी रहेको जनाइएको थियो। सरासर काम भएमा त्यो ३ प्रतिशत काम तीन चार महिना भित्र पूरा हुने बताइएको थियो। त्यस्तैमा ठेकेदार कम्पनी सी.एम.सी. ले ३६ करोड रकमको चेक भुक्तानीको लागि पेश गर्यो। क्रिसमसको पूर्व सन्ध्यामा पेश गरेको त्यही चेक विवादको विषय बन्यो।

५. सी.एम.सी.का पदाधिकारीहरूले चेकको भुक्तानी नपाएपछि काम छोडेर जाने धम्मकी दिए भने नेपाली पदाधिकारीहरूले उनीहरू भाग्न लागेको आरोप लगाउँदै पुलिसद्वारा उनीहरूको पासपोर्ट खोसे पछि केही कुरा मिलाएर उनीहरू क्रिसमसको विदामा आफनो देश त फर्के तर सुरक्षाको कारण देखाएर उनीहरू नेपाल आउन तयार भएनन्। उनीहरूले तेस्रो मुलुकमा वार्ता गर्ने भनेका छन्।

६. उनीहरू नेपाल नआएपछि नेपालले एकतर्फी रुपमा ठेक्का तोडेको छ। ठेक्का तोडिएपछि अव नयाँ ठेकेदार खोज्नका लागि केही समय बढी लाग्नु स्वाभाविक भएको छ। समय बढी लाग्नु स्वाभाविक हो तर त्यो भन्दा ठूलो कुरा त्यसलाई के कसरी अघि बढाउने भन्ने कुरामा नै अन्यौल छाएको छ।

७. आयोजनाको  पक्ष र विपक्षमा धेरैकुरा सुनिन थालिएको छ। एक पक्ष ठेकेदारको दोष देखाउँदै छ भने अर्को पक्ष नेपाली पदाधिकारीलाई दोषी देखाउने  गरेका छन्। दोष कसको भन्ने वहस अव केही समय चल्दै जाने छ।तर त्यसैमा अलमलिनु हुँदैन। काठमाण्डोमा छिटो पानी उपलब्ध गराउनु अत्यावश्यक भएकोले जहाँ जसरी हुन्छ छिटो काम सम्पन्न गराउनु पर्दछ र छिटो पानी आपूर्ति गर्नु पर्दछ।

तपाइको विचार व्यक्त गर्नुहोस्

प्रमुख समाचार

डडेल्धुरामा बस दुर्घटना पाँचको मृत्यु