१. भारतीय प्रधानमन्त्री नरेन्द्र मोदीको भ्रमणको तैयारीको क्रममा विदेशमन्त्री सुषमा स्वराज आज नेपालमा आउने भएका छन्। भारतीय नेताहरुको यो भ्रमणले नेपालमा धेरै तरङ्ग उत्पन्न गरेको छ। खास गरेर भारतले हालै पठाएको जलविद्युत् प्रस्तावले विवाद नै उत्पन्न गरेको छ। कोही त्यो प्रस्ताव फिर्ता पठाउनु पर्दछ भन्दै छन् भने कोही त्यसमा रहेको नेपालको हित विपरीतको बुँदाहरु संशोधन गर्नुपर्दछ भन्दैछन्।

२. नेपाल-भारतका बीच भएका सन्धीसम्झौतामा जहिले पनि नेपाल ठगिएको महशुस गरिएको छ। सन्धीसम्झौता गर्ने तर काम नगर्ने भारतको प्रवृत्ति यहाँ आलोच्य भएको छ। महाकालीबाट नेपालीहरुले जेजस्तो आश त्यसबेला गरेका थिए, त्यो केही पनि पाएका छैनन्। भारतले अधिकार त लियो तर आजसम्म काम थालिएन। यो नेपालीको गुनासो हो।

३. नेपालको सीमा अतिक्रमण भएको छ। सीमा नजिक भारतले एकतर्फी रुपमा बाँध आदि बनाएर वर्षाको बेला खोलानालाको पानी थुनेर नेपाली भूभाग जलमग्न गर्ने काम गरिरहेको छ। छिमेकी भएर रहेपछि छिमेकको दुःख पीडा बुझिदिनु पर्दछ र तदानुसारको व्यवहार भारतबाट हुनुपर्दछ।

४. भारतसँगको नेपालको व्यापार घाटा कहाली लाग्दो किसिमले बढ्दो छ। नेपाली उत्पादन भारतमा सजिलै निर्यात गर्ने प्रावधान गरिनुपर्दछ। भारतका यातायातका साधन सजिलै नेपाल प्रवेश गरेझैं नेपाली साधन पनि भारतमा निर्वाध जान पाउनुपर्दछ। यस्ता धेरै कुरा छन्, जसमा नेपाल खुम्चिएर बस्नु परिरहेको छ।

५. भारतले सहयोग गर्ने भनि दिएको बचन धेरै क्षेत्रमा केही भएको छैन। भारतीय तत्कालीन प्रधानमन्त्री चन्द्रशेखर नेपाल आउँदा रेलमार्गको कुरा उठेको थियो। तर अझसम्म त्यो काम पनि भएको छैन। यस्ता धेरै आश्वासनको कुम्लो बोकेर नेपालीहरुले धेरै वर्षदेखि प्रतीक्षा गरिरहेका छन्।

६. नेपालको नजिकको मित्र भारत हो। आफ्ना दुःख वेदना मित्रलाई नभने कसलाई भन्ने – त्यही हिसाबले हामीले सर्वसाधारण नेपालीहरुले भोगेको कुरा यहाँ संक्षेपमा राखेका छौं। सीमा अतिक्रमण र सीमानामा हुने जलमग्नको विषय गम्भीर छन्। त्यसलाई तल्लो स्तरबाट समाधान गर्न पनि सक्दैन।

७. अहिले उच्चस्तरीय वार्ता हुन गइरहेको बेलामा यस्ता संवेदनशील विषयलाई नेपालले राख्नुपर्दछ र भारतले पनि त्यसको महशुस गरी समस्या समाधान गर्नुपर्दछ। मोदी सरकारले छिमेकीहरुसँगको सम्बन्ध सुधार्ने उद्देश्यले जेजति महत्त्व दिएर प्रधानमन्त्री मोदी तथा विदेशमन्त्री स्वराजले नेपाल भ्रमण गर्दैछन्, त्यो ठूलो कुरा हो, हामी यी भ्रमणहरुबाट नेपाल र नेपालीको समस्या समाधान हुन्छ र नेपाल र भारतको सम्बन्ध अरु सुदृढ हुन्छ भन्ने पक्षमा छौं।