माता चन्द्रकला पौडेल र पिता हरिप्रसाद पौडेलका ज्येष्ठ सुपुत्रको रुपमा विसं १९९८ साउन २४ गते शुक्रबार पोखरा ६ स्थित जरेवरमा जन्मिनुभएको थियो, गोविन्द शर्मा ‘विखर्ची’ पौडेल । उमेर हिसाबले ८० वर्षको उमेरमा विसं २०७८ जेठ २७ गते आइतबार आफ्नै निवास पोखरामा उहाँको निधन भयो । भौतिक शरीर अब यो धर्तीमा नरहे पनि उहाँले आफ्नो जीवनकालमा गरेका प्रशंसनीय सामाजिक कार्यले अनन्तकालसम्म उहाँ धेरैको हृदयमा रहिरहनु हुनेछ ।
सामाजिक व्यक्तित्व जहाँ जान्छन्, त्यही सामाजिक काम गरेर समाजलाई प्रभाव पार्दछन् । त्यस्तै उहाँ पनि २०१८ सालमा पोखराबाट चितवन बसाइँ सरेर त्यहाँको सामाजिक क्षेत्रमा सक्रिय रुपमा योगदान दिनुभएको थियो । २०४९ सालमा पुनः पोखरा फर्किएर आफ्नो पैतृकथलोमा व्यवसाय सुरु गर्न थाल्नु भयो । चितवन बसाइँसराइको मुख्य उद्देश्य त्यतिबेला सस्तो मूल्यमा पाइने जग्गा खरिद र कृषि कार्य गर्नु र आर्थिक व्यवसाय चलाउनु थियो । आफ्नो रोजगारीको लागि कृषि कर्मबाट मात्रै पर्याप्त नभएकोले विभिन्न खालका ठेक्कापट्टा र खाद्यान्न कुटानीपिसानीका मिल सञ्चालन गर्नु हुन्थ्यो । १५ वर्षदेखि कान्छो छोरा (मेरा ज्वाइँ) भीष्मराज पौडेल र छोरी नीलम गौतम पौडेलसँग बस्दै आइरहनुभएको र २ वर्षयता पैत्रिक जग्गामा बुटिक होटल निर्माण गर्ने भएकोले पोखरा ७, एयरपोर्टस्थित मेरो घर नजिकै आएर बसोबास गर्दा नातिनातिनासँग भनेको बेला देख्न भेट्न र खेल्न पाउँदा अझै नजिक हुने अवसर र सामीप्यता बढ्न गई मलाई धेरै नै खुसी बनाएको थियो ।
कृषि उत्पादनमा रहेको कमीकमजोरीले नेपालको विकासमै नकारात्मक प्रभाव पारेकोमा उहाँको मार्मिक दुःखेसो थियो । त्यसैले होला उहाँले तत्कालीन मेघौली गाउँ पञ्चायतभित्र उन्नत कृषि प्रविधि भित्रयाउन सहयोग गर्नु भएको थियो । उन्नत विउँ विजन, उन्नत तरिकाले पशुपालन सबैको खेतमा ट्रयाक्टर प्रयोग गरी खेती गर्ने अभियानमा पनि लाग्नु भयो । कुनै समयमा खाद्यान्न निर्यात गर्ने देश अहिले ठूलो परिणाममा खाद्यान्न आयात गर्ने देश बनेकोमा उहाँमा गहिरो दुःख देखिन्थ्यो ।
कृषि कार्यमा काम गर्दै जाँदा किसान संगठन र वर्गीय संगठनको सदस्य समेत भएर काम गर्दै जानु भयो । बाटो नभएको ठाउँमा बाटो र विद्यालय नभएको ठाउमा विद्यालयहरु खोल्ने सामाजिक कार्यमा सक्रियताका साथ लाग्नु भयो । विद्यालयहरुमा आफैं स्वयंसेवी शिक्षक भएर अध्यापन समेत गर्नुभयो । विशेषतः मेघौलीको साँझापुर विद्यालयबाट अध्यापन कार्य सुरु गर्नुभएको थियो । त्यसैले त उहाँलाई चितवनको मेघौली र आसपासको क्षेत्रमा मास्टर साहेव वा विखर्ची सर भनेर चिन्दछन् ।
त्यहाँस्थित जानकी माविमा उहाँको गहिरो लगाव थियो । तत्कालीन उच्च माविमा रुपान्तरण गर्न, गुणस्तर शिक्षामा अभिवृद्धि गर्न र भौतिक संरचना निर्माणको लागि २०७७ सालमा लगाइएको महायज्ञमा उहाँले मनग्य दान प्रदान गर्नु भएको थियो । यो विद्यालसँग उहाँको भावनात्मक सम्बन्ध ज्यादै गहिरो रहेको कारण नगद दान प्रदान गर्नको लागि श्रीमती तथा नाति साथमा लिएर अस्वस्थ्य रहेकै अवस्थामा एयरलिफ्टबाट महायज्ञ स्थलमै पुग्नु भएको थियो । महायज्ञ आयोजक समिति तथा विद्यालय परीवारले भव्य तथा विशिष्ट खालको सम्मान र अभिनन्दन गरेको थियो ।
२०२८ सालमा राष्ट्रिय शिक्षा पद्दति चितवन जिल्लामा लागु भएपछि शिक्षाका धेरै गतिविधि परिवर्तन भए । मुख्यतयः सरकारी विद्यालयमा शिक्षकको तलब सरकारले नै पठाउन थाल्यो । मेघौली गाउँ पञ्चायतभरका प्राविहरुको सदस्यसचिव (प्रमुख) भएर गाउँ पञ्चायतभित्रको शैक्षिक तथा भौतिक प्रगति प्राप्त गर्न सक्रिय भएर लाग्नु भयो । यस अलावा मेघौली गाउँ पञ्चायत भित्रका विकास र निर्माणका कार्यमा महत्वपूर्ण भूमिका खेल्नु भएको थियो । वास्तवमा उहाँ उदार समाजवादी विचार धाराका व्यक्ति हुनुहुन्थ्यो । पञ्चायती व्यवस्थालाई त केवल उपयोग मात्रै गर्नु भयो भने २०४७ सालपछि कम्युनिष्ट राजनीतिमा प्रवेश गर्नु भएको थियो । नेपाल कम्युनिष्ट पार्टी (एमाले) को सक्रिय संगठित सदस्य भएको नाताले उहाँको विशेष सम्बन्ध जनप्रिय नेता स्व. मनमोहन अधिकारी र मदन भण्डारीसँग थियो । मनमोहन अधिकारीसँग त धेरै कार्यक्रममा सँगै हिंडने पनि गर्नु भयो । कम्युनिष्ट पार्टीका उच्चस्तरका धेरै भन्दा धेरै शीर्षनेतासँग उहाँको सामीप्यता थियो ।
जीवन भनेको नै सामाजिक कार्यमा समर्पित हुने हो भन्ने मान्यता उहाँले बोक्नु भएको थियो । त्यसैले उमेरले र स्वास्थ्यले थाक्दै गए तापनि सामाजिक कार्यमा भने थाक्नु भएको थिएन । सामाजिक कार्यमा उहाँले कहिले सुख र कहिले दुःखको भारी बोकेर हिंंडनु भएकै थियो । उकालीको सुख भन्ने हो भने शिक्षित, विद्वान र उच्च पदस्थ छोराबुहारीको आदर्श जीवन र गतिलो कमाइले परमानन्दले सुखी जीवन दिइराखेको थियो । तर रोग व्याधिलाई कसैले रोकेर रोकिंदो रहेन छ र आखिर घरपरिवारलाई मात्रै होइन संसारलाई नै छाडेर जानुभयो ।
२०७४ सालको पूवाद्र्धसम्म उहाँको स्वास्थ्य राम्रै थियो । सामान्य खालको मधुमेह र रक्तचापको औषधी चिकित्सकको परामर्श बमोजिम सेवन गरिरहनु हुन्थ्यो । यो समस्या नियन्त्रणमा राखी राख्नु भएको थियो । तथापि २०७४ सालको कात्तिकतिर उहाँको स्वास्थ्यमा केही समस्या देखापरेपछि ल्याब परीक्षणमा अर्बुद रोग देखा प¥यो । उपचारको लागि काठमाडांै र पछि दिल्लीको नामुद अर्बुद हस्पिटल लगियो । त्यहाँ उपचारपछि त्यसैलाई निरन्तरता दिंदै काठमाडौंको नेपाल क्यान्सर हस्पिटलमा लामो समयसम्म उपचार पछि उहाँ अर्बुद रोग धेरै हदसम्म ठिक भए तापनि पछि गएर रक्तअल्पता र अन्य विभिन्न स्वास्थ्य समस्याले गर्दा लामो समयसम्म रोगविरुद्ध लड्नु प¥यो । ४÷५ महिनाबाट उहाँको स्वास्थ्य स्थिति गम्भीर बन्दै गयो । अन्त्यमा गत असार २७ गते फिस्टेल हस्पिटलमा उपचारकै क्रममा यस संसारबाट बिदा लिनु भयो । स्वर्गारोहण खबरले म अत्यन्तै स्तव्ध भए भने घररिवारको भावविह्लले गर्दा मेरो मुटुले नै ठाउँ छोडेजस्तो भयो ।
आफन्त र छरछिमेकी छिणभरमै घरमा जम्मा हुन थालिसकेका थिए । सबै यो दुःखद घटनाबाट सम्हालिंदै पार्थीव शरीरको समाधितर्फ व्यवस्था हुन थाल्यो । यो सालको वर्षाले देशभर नै धनजनको ठूलो क्षति बनायो भने त्यो दिन पनि मुसलधारे वर्षाले ज्यादै दुःख दिइरहेको थियो । शवयात्राको व्यवस्था हिन्दू परम्पराअनुसार आफ्नै प्रिय भाइ पद्यप्रसाद पौडेलको निर्देशनमा व्यवस्थित गरिएको थियो ।
शवयात्रामा नातागोता, साथीभाइ, छरछिमेकी, समाजका लव्ध प्रतिष्ठित व्यक्ति, वर्तमान तथा निवर्तमान सांसद, विभिन्न राजनीतिक दलका नेता, कर्मचारी तथा सर्वसाधारणको निकै बाक्लो सहभागिता थियो । स्वर्गारोहणले गर्दा आफन्तलाई ज्यादै व्याकुल र अशान्त बनाइरहेको थियो । उपस्थित आफन्तले अन्तिम श्रद्धाञ्जली दिइरहेका थिए भने दुःखको पीडाले सबैका आँखा रसाइरहेका थिए । कतिपय त बिछोडको पीडा सहनै नसकी चित्कारसहित रोइरहेका थिए । ज्यादै सन्नाटा र कारुणीक वातावरण थियो ।
श्रीमतीहरु, छोराबुहारीहरु र नातिनातिनाहरु अन्तिम श्रद्धाञ्जलीको लागि पार्थीव शरीरको चारैतिर हात जोडेर अन्तिम बिदाइ गरिरहेका थिए ।
शवयात्राले आफ्नो बासस्थान फन्को मार्दै पवित्र मानिने सेती नदी तिरमा बनेको शवदाहस्थल शान्तिघाटतर्फ लाग्यो । शान्तिघाटमा आधुनिक विद्युतीय शवदाह यन्त्र पनि छ । तर, त्यो शवदाह यन्त्र हेर्न सकिने तर प्रयोग गर्न भने नसकिने रहेछ । सेती नदी तिरको त्यो शान्तिघाटमा उहाँको शव राख्दा धेरैका आँखा रसाइरहेका थिए ।
अति प्यारा भाइ पद्यप्रसाद, छोराहरु प्रकाश, विश्व, भीष्म पौडेलहरु चिता नजिकै एकोहोरो टोलाइरहनु भएको थियो । मैले पनि अन्तिम श्रद्धाञ्जलिको लागि चितामा एक फूल अर्पण गरें । मैले धेरै पहिलाबाटै आदर र सम्मान गर्ने व्यक्तिहरुमध्ये उहाँ एक हुनुहुन्थ्यो भने पछि सम्धीको नाताले त आदरणीय मात्रै होइन पुजनिय सम्धी हुनुहुन्थ्यो ।
उहाँको भौतिक शरीर चिताले खरानी बनाइसकेपछि पनि धेरैले अन्तिम श्रद्धान्जली दिइरहेका थिए । उहाँका प्रिय भाइ, छोराहरु र नातीहरुलाइ मैले कुनाबाट घरीघरी हेरीरहे । उहाँहरुको चितातर्फ र घरीघरी हामीतर्फ फर्किरहने मलिन तर उदासीन र दुखी अनुहारलाई मैले पनि हेरिरहें । मेरा आदरणीय ज्वाइँ, छोरी र नातिनातीको घरपरिवारको लागि कहिल्यै पूरा नहुने गरी रिक्तताले छाएकोमा मेरो मनै खिन्न भयो ।
ती शालीन, मृदुभाषी, समाजसेवी, शिक्षाप्रेमी, छलकपट केही नभएका, मानिस पनि सुन्दर व्यवहार पनि सुन्दर भएका व्यक्तिको भौतिक शरीर अब न लेकसाइड, न जहरेवर न त चितवनको आफ्नो पुरानो कर्मथलो न कुनै गाउँ ठाउँमा कतै र कहिल्यै भेटिने छैन ।
घरपरिवारलाई उज्यालो छाडेर परलोकमा त शुद्ध आत्मामात्रै लिएर जानुभयो । आत्मा मर्दैन भनिन्छ, यदि साँचो हो भने तपाईको आत्माले शान्ति पाओस् । तपाईले समाजलाई दिएको त्याग र योगदान हामीले कहिल्यै भुल्ने छैनांै । अझै समाजको लागि गर्नुपर्ने अधुरा कार्य छन् भने ती अधुरा कार्यहरु पूरा गर्ने तपाईका छोराछोरी र हामीहरुको पनि कर्तव्य हो । यो कुनै हालतमा पनि भुलिने छैन ।
अन्त्यमा, यस दुखद घडीको आज १३ औं दिनको पुन्यतिथिमा दिवंगत आत्माको चिरशान्तिको कामना गर्दै हार्दिक श्रद्धाञ्जली अर्पण गर्दछु ।
Related News
सम्बन्धित समाचार
कास्की कांग्रेसको शिखर पुरूषको अवसान
जून ओर्लेको रात र त्यसको आलोक
नयाँ बिहानी: आदर्श समाजको २९ औं वर्ष
गण्डकी प्रदेश प्रशिक्षण प्रतिष्ठानका ४ वर्ष र आगामी कार्यदिशा
राणा कालमै हलो जोत्ने क्रान्तिकारी पं. मुक्तिनाथ
hero news full width
मुख्य समाचार
मनिपालमा अत्याधुनिक एमआरआई मेसिन
१३ वटा मुद्दा चलेका एक युवा पोखराबाट अटोमेटिक पेस्तोलसहित पक्राउ
वैशाख १३, २०८१कतारी अमिर स्वेदश फिर्ता : पोखरा–कतार उडान माग
वैशाख १३, २०८१कास्कीमा एसइई उत्तरपुस्तिका परीक्षण रोकियो
वैशाख १२, २०८१गण्डकीमा डायलाइसिसका लागि अब पालो कुर्न नपर्ने
वैशाख १२, २०८१स्वदेश फर्किए कतारी अमिर
वैशाख १२, २०८१